İlqar Qurbanov: Çempion olduğum stadionun tribunalarını boş görmək üzücü idi
"Qarabağ"ın müdafiəçisi İlqar Qurbanov Topaz Premyer Liqasının 12-ci turu çərçivəsində "Xəzər Lənkəran"a qarşı keçirdikləri oyundan sonra azerisport.az saytının suallarını cavablandırıb.
- Oyunla bağlı nə deyə bilərsiniz?
- Bu, çox vacib oyun idi. Qələbə qazanıb, uğurlu seriyamızı davam etdirmək istəyirdik. Amma çətin olacağını da bilirdik. "Xəzər Lənkəran"ın heyəti daha çox gənc futbolçulardan formalaşıb. Onlar bizə az problem yaratmadılar. Bu oyunda cəmi bir qol vursaq da, əsas qələbə qazanmaq idi.
- Qazonun vəziyyəti sizə nə dərəcədə problem yaratdı?
- Meydanın vəziyyəti ağır idi. Amma biz buna baxmayaraq, mübarizə apardıq.
- Epizodların birində hakimlə çox kəskin mübahisə etdiniz. Həmin epizodda nə baş vermişdi?
- Hərdən belə olur. Ola bilsin ki, bu, oyunun tez-tez dayanmasından irəli gəlirdi. Belə qazonda təkbətək mübarizələr normaldır. Amma oyunun tempini bu qədər aşağı salmaq olmazdı.
- "Qarabağ" turnir cədvəlində yaxın izləyicilərindən xeyli uzaqlaşıb. Artıq indidən rəqibləriniz üçün əlçatmaz olduğunuzu demək olar?
- Mən belə deməzdim. Belə xal fərqləri əvvəllər də olmuşdu. Amma biz sonadək mübarizə aparmışıq.
- Yenidən Lənkəranda, keçmiş komandanıza qarşı oynamaq necə idi?
- "Xəzər Lənkəran"da gözəl günlərim keçib. Nə vaxtsa çempion olduğum bu stadionun tribunalarını boş görmək üzücü idi. Amma inanıram ki, XL əvvəlki günlərini geri qaytaracaq.
- XL bu heyətlə nəyə nail ola bilər?
- Bilmirəm. Bu barədə danışmağım düzgün olmaz.
- Növbəti turda "Kəpəz"lə qarşılaşacaqsınız...
- Hazırda çempionatda qısa fasilə yaranıb. Bir qədər istirahət edib, qarşıdakı oyuna hazırlaşmaq istəyirik. "Kəpəz" əla komandadır, çox yaxşı baş məşqçisi var. Çətin olacaq. Amma biz meydana qələbə üçün çıxacağıq.
- Avropa Liqasının qrup mərhələsində sizi İngiltərə "Tottenhem"i və Belçika "Anderlext"i ilə oyunlar gözləyir. Qrupdan çıxmaq şansınız var?
- Şans hələ ki, bərabərdir. Çox maraqlı və çətin qrupumuz var. Biz maksimum nəticəyə nail olmaq istəyirik. Allah eləsin ki, buna nail olaq.
- Robert Prosineçki də Berti Foqts kimi sizi milliyə dəvət etmir. Xorvat mütəxəssisin diqqətini çəkmək belə çətindir?
- Mənim işim oynamaqdır. Bu, Robert Prosineçkinin qərarıdır. Hörmətlə yanaşıram.