Yığmamızın futbolçuları son turda: 22 nəfərə 5 qol!
Azerisport.az sizi ənənəvi olaraq, noyabrın 17-də Moldova ilə yoxlama oyunu keçirəcək Azərbaycan millisinə dəvət alan futbolçuların klublarının heyətindəki göstəriciləri ilə tanış edir.
Qapıçılar
Kamran Ağayev ("Karşıyaka", Türkiyə): Qapıçı İzmir derbisində "Göztəpə" ilə matçda 90 dəqiqə oynayıb və qapısını toxunulmaz saxlamağı bacarıb (1:0). Bu, Ağayev üçün Türkiyə PTT 1-ci liqasının cari mövsümünün geridə qalan 11 turunda 3-cü "quru" hesablı oyunu olub.
Aqil Məmmədov ("Neftçi"): Topaz Premyer Liqasının 12-ci turunda "Rəvan"la qarşılaşmada (2:3) iştirak etməyib.
Anar Nəzirov ("Zirə"): "Sumqayıt"a qarşı 90 dəqiqə meydanda olduğu oyunda iki qol buraxsa da, komandası qələbə qazanıb (3:2).
Səlahət Ağayev ("İnter"): "Qəbələ"yə qarşı oyunda 90 dəqiqə mübarizə aparıb, bir qol buraxıb (1:1).
Müdafiəçilər
Tərlan Quliyev ("Kəpəz"): AZAL-la oyunda 90 dəqiqə çıxış edib, komandası heç-heçə edib (1:1).
Rəşad Sadıqov, Bədavi Hüseynov, Maksim Medvedev (hamısı "Qarabağ"): Rəşad sonuncu dəfə Avropa Liqasının qrup mərhələsinin dördüncü turu çərçivəsində Fransa "Monako"su ilə qarşılaşmada 90 dəqiqə meydanda olub və qol ötürməsi ilə yadda qalıb (1:1). Əvəzində o, "Xəzər Lənkəran"la oyunu buraxmalı olub (1:0). Amma Bədavi ilə Maksim həm "Monako", həm də "Xəzər Lənkəran"la oyunda 90 dəqiqə meydanda olub.
Arif Daşdəmirov, Məhəmməd Mirzəbəyov, Ürfan Abbasov (hamısı "Qəbələ"): Arif "İnter"ə qarşı oyunda 90 dəqiqə meydanda olub, Ürfanla Məhəmməd isə bir hissə mübarizə aparıb. Hər üç futbolçu bu görüşdə sarı vərəqə ilə cəzalanıb.
Pavel Paşayev ("Metallurq", Zaporojye): Luqansk "Zarya"sı ilə səfər oyununda iştirak etməyən Paşayevin komandası darmadağınla üzləşib - 1:4.
Yarımmüdafiəçilər
Rəşad Eyyubov ("Kəpəz"): AZAL-la qarşılaşmada 90 dəqiqə çıxış edib, sarı vərəqə ilə yadda qalıb.
Qara Qarayev, Elvin Məmmədov, Əfran İsmayılov ("Qarabağ"): İsmayılov "Xəzər Lənkəran"la matçda 65 dəqiqə meydanda olub və komandasının yeganə qoluna imza atıb. Məmmədov 90 dəqiqə mübarizə aparıbsa, Qarayev sonadək ehtiyat oyunçular skamyasında qalıb.
Rəhman Hacıyev ("Neftçi"): "Rəvan"la oyunda 90 dəqiqə çıxış edib.
Toğrul Erat ("Fortuna", Düsseldorf, Almaniya): Almaniya qərb regional liqasının 15-ci turu çərçivəsində "Alemaniya" ilə qarşılaşmada 89 dəqiqə mübarizə aparıb, komandasının qələbəsinə (3:1) bir qolla töhvə verib.
Rahid Əmirquliyev, Elşən Rzazadə (hər ikisi "Xəzər Lənkəran"): Hər ikisi "Qarabağ"la qarşılaşmada 90 dəqiqə meydanda olub.
Hücumçular
Ruslan Qurbanov ("Neftçi"): "Rəvan"a uduzduqları görüşdə 90 dəqiqə meydanda olub, iki qol vurub.
Ağabala Ramazanov ("Sumqayıt"): "Zirə" ilə qarşılaşmada 90 dəqiqə meydanda olub, qol vursa da, komandasını məğlubiyyətdən xilas edə bilməyib (2:3).