Samir Abasov: Sumqayıt Qəbələ deyil ki, son iki məğlubiyyəti faciəyə çevirək
"Sumqayıt"ın baş məşqçisi Samir Abasov Topaz Premyer Liqasının 13-cü turunda qarşılaşacaqları "Qəbələ" ilə oyun öncəsi azerisport.az saytının suallarını cavablandırıb.
- İşləriniz necə gedir?
- Son dövrlər işlərimiz lap çoxalıb. Xüsusilə də məşqçilik kurslarına görə. Güclə çatdırıram. İki cəbhədə çalışıram. Ola bilər ki, komandaya bu öz təsirini göstərmir, amma işlərimə təsir edir. Bir tərəfdən kurslar, digər tərəfdən məşqlər. Üstəlik, öz oyunlarımızı analiz etmək, rəqib komandaların oyunlarını öyrənmək də var.
- Samir Əliyev Pro kurslarına görə "Neftçi"dən ayrıldı...
- Mən hazırda A kateqoriyalı məşqçi kursuna qatılıram. Həm də kurslar Bakıda təşkil olunur. Fikrimcə, Əliyev kimi postumu tərk etməyə dəyməz. Amma kurslara qatılmaq doğrudan da çox güc alır.
- Növbəti turda qarşılaşacağınız "Qəbələ"nin oyununu xüsusi analiz etməyə dəyir?
- "Qəbələ" də "Qarabağ" kimi hər kəsə yaxşı tanışdır. Hər iki komanda Avropa Liqasında çıxış edir və biz onların oyunlarını mütəmadi izləyirik. Onlarla bağlı yetərincə məlumatımız var. Bircə onların bizə qarşı hansı heyətlə oynayacağı sual doğurur. Roman Qriqorçukun rəhbərliyi altında 30-35 futbolçu çıxış edir.
- "Qəbələ" hansı heyətlə oynamasından asılı olmayaraq, son turlarda xal itirir...
- Rəqibimiz istənilən heyətlə güclü və təhlükəlidir. Bəli, onlar son dövrlər uğursuz çıxış edirlər. Həm də onları gələn həftə Yunanıstan PAOK-u ilə səfər oyunu gözləyir. Ona görə də bizə qarşı hansı heyətlə oynayacaqlarını proqnozlaşdırmaq çətindir. İstənilən halda biz bu komandaya qarşı layiqli müqavimət göstərmək istəyirik. Öz meydanımızda çıxış edəcəyik. Ona görə də uduzmaq olmaz.
- Sizin komandanız da son iki turda məğlubiyyətlə üzləşib...
- Bizdə eniş yoxdur. Biz "Qəbələ" kimi liderlər qrupunda getmirik ki, bu iki məğlubiyyəti faciəyə çevirək. Hamı bizim imkanlarımızı, qarşımızdakı hədəfləri yaxşı bilir. Vəziyyəti düzgün qiymətləndiririk. Məsələn, "Neftçi"yə uduzsaq da, yaxşı oynadıq, razı qaldım. Səhvlərimizi növbəti turlarda aradan qaldırmağa çalışacağıq.
- Azərbaycanın əsas yığması Moldovaya (2:1), U-21 komandamız isə Rusiyaya (3:0) qalib gəldi. Bu oyunlarla bağlı nə deyə bilərsiniz?
- Hər iki komandamız bizi sevindirdi. "Sumqayıt"ın baş məşqçisi kimi mənə ikiqat sevindiricidir ki, bu oyunlarda bizim futbolçular da iştirak etdilər. Onların uğurunu kənardan izləmək çox xoşdur. Xüsusilə Ağabala Ramazanova görə çox sevindim.
- Amma o, bir qol vursa da, daha bir yüzfaizli qol imkanını qaçırdı...
- Hücumçu üçün dörd epizoddan birini qola çevirmək artıq yaxşıdır. Futbolçular var ki, bunu da bacarmırlar.
- Ramazanov növbəti seçmə mərhələdə Azərbaycan yığmasının əsas hücumçusu ola bilər?
- Hazırda Ağabala yüksəlişdədir. O, qarşısına yığmanın əsas heyət oyunçusu olmaq hədəfini qoyub. Hər şey özündən asıldırı. Mənim fikrimcə, Robert Prosineçki də ondan razı qalıb.