Topaz Premyer Liqasında 13-cü tur həyəcanı
Bu gün Topaz Premyer Liqasında 13-cü tura start veriləcək. Azerisport.az xəbər verir ki, milli komandaların oyunları ilə əlaqədar yaranan qısa fasilədən sonra keçiriləcək tur “Xəzər Lənkəran” və “Neftçi” arasında “Böyük oyun”la əlamətdar olacaq. Turun qarşılaşmaları 3 gün davam edəcək.
İlk oyun günündə iki görüş baş tutacaq. Öncə "Sumqayıt" doğma meydanda “Qəbələ” ilə qarşılaşacaq. Bu iki komandanın əvvəlki 13 oyununda qəbələlilərin daha böyük üstünlüyü var - 11 qələbə. Sumqayıtlılar bu rəqibinə cəmi 1 dəfə qalib gəldikləri halda, 1 dəfə də heç-heçəyə imza atıblar. Top fərqi də "Qəbələ"nin xeyrinədir 28:8. “Qəbələ” son 3 qarşılaşmada qalib gəlib. “Qırmızı-qaralar” əvvəlki 13 matçın hamısında qol sevinci yaşayıb. “Sumqayıt” 8 oyundur qalib gələ bilmir. Samir Abasovun gəlişindən sonra uğurlu çıxış edən sumqayıtlılar son iki turda uduzduğu üçün, bu oyunda növbəti dəfə sürpriz nəticəyə imza atmağa çalışacaqlar. "Qəbələ" də son dörd oyunda qələbə qazana bilmir. Bu üzdən Roman Qriqorçukun komandası uğursuz gedişata son qoymağı hədəfləyib. Birinci dövrədə baş tutan oyunda "Qəbələ"nin bu rəqibini 1:0 hesabıyla məğlub etdiyini də xatırladaq.
Günün digər oyununda lider "Qarabağ" “Kəpəz”i qəbul edəcək. Ağdam klubu bu rəqibi ilə görüşlərdə cüzi də olsa, üstünlüyə malikdir. 16 qələbə qazanan Qurban Qurbanovun komandası 14 dəfə də meydanı məğlub tərk edib. Daha 8 qarşılaşmada isə heç-heçə qeydə alınıb. Top fərqində isə gəncəlilər üstündürlər - 51:47. “Qarabağ” 13 oyundur rəqibinə uduzmur. Gəncə təmsilçisi son 8 görüşdə cəmi 1 xal qazanıb. Ağdamlılar evdəki son 3 matçda qalib gəlib. İlk dövrədəki qarşılaşmada da "Qarabağ" 3:2 hesabıyla qalib gəlmişdi. Elə bu görüşdə də Ağdam klubu favorit göstərilir. Amma Şahin Diniyevin komandası da sürprizə imza ata bilər.
İkinci oyun günü "Böyük oyun"la əlamətdar olacaq. "Xəzər Lənkəran" doğma meydanda “Neftçi”ni qəbul edəcək. Tərəflərin əvvəlki 34 oyununda daha çox heç-heçə qeydə alınıb - 15 dəfə. Cənublular 7 dəfə qalib gəldikləri halda, "ağ-qaralar" 12 dəfə 3 xala seviniblər. Top fərqi də bakılıların xeyrinədir - 39:28. “Xəzər Lənkəran” 9 oyundur bu rəqibinə qalib gələ bilmir. Paytaxt klubu son 8 qarşılaşmada meydanı qolsuz tərk etmir. “Neftçi” səfərdə 12 oyundur qələbə qazanmır. “Xəzər Lənkəran”ın son 4 ev qarşılaşmasında heç-heçə qeydə alınıb ki, bunların üçündə 2:2 hesabına təsadüf olunub. İlk dövrədə Bakıda baş tutan qarşılaşmanın 1:1 hesablı heç-heçə ilə bitdiyini də xatırladaq. Paytaxt təmsilçisi bu oyuna yeni baş məşqçi ilə çıxacaq. Samir Əliyevi əvəz edən Əsgər Abdullayev prinsipial qarşılaşmada uğurla starta ümid edəcək. Heyətlə bağlı çox ciddi problemləri olan Yunis Hüseynov isə daha çox doğma meydan və azarkeş amilindən yararlanmağa çalışacaq.
Çempionatın cari mövsümünün sürpriz komandası olan “Zirə” bu tur səfərdə "Rəvan”ın qonağı olacaq. Bu iki klub indiyə qədər cəmi bir dəfə üz-üzə gəliblər ki, o da zirəlilərin 2:1 hesablı qələbəsi ilə üz-üzə gəlib. Bu oyunda da Adil Şükürovun komandası favorit hesab olunur. Lakin Bəhmən Həsənovlu "Rəvan" da "Neftçi" üzərində qələbə qazandığı kimi, sürpriz nəticəyə imza ata bilər.
Turun son oyun günündə bir görüş keçiriləcək. “İnter” paytaxt derbisində AZAL-la qarşılaşacaq. Bu klub indiyə qədər 27 oyunda üz-üzə gəliblər ki, onların 10-da "İnter", 5-də isə "təyyarəçilər" 3 xala seviniblər. Qalan 12 görüşdə heç-heçə qeydə alınıb. Top fərqi də "bankirlər"in xeyrinədir - 25:20. AZAL son 8 oyunda qələbə qazana bilməyib. “İnter” ardıcıl 9 matçdır meydanı qolsuz tərk etmir. Sonuncular evdə keçirdiyi son 3 qarşılaşmada xal itirməyib. İlk dövrədə baş tutan görüşdə "İnter" 1:0 hesabıyla qalib gəlmişdi.
Topaz Premyer Liqası
13-cü tur
21 noyabr (şənbə)
17:00. “Sumqayıt” - “Qəbələ”
Hakimlər: Elvin Əsgərov, Rahil Ramazanov, Elman Musayev, Namiq Hüseynov.
Əlavə köməkçi hakimlər: Rauf Cabbarov, Ömər Paşayev.
AFFA nümayəndəsi: Adil Nadirov.
Hakim-inspektor: Murad Məmmədov.
Sumqayıt. “Kapital Bank Arena”.
19:30. “Qarabağ” - “Kəpəz”
Hakimlər: Orxan Məmmədov, Yaşar Abbasov, Kamran Bayramov, Ziya Nəsirov.
AFFA nümayəndəsi: Sakin Məmmədzadə.
Hakim-inspektor: Gülağa Cabarov.
Bakı. Tofiq İsmayılov adına Suraxanı qəsəbə stadionu.
22 noyabr (bazar)
18:00. “Xəzər Lənkəran” - “Neftçi”
Hakimlər: Əliyar Ağayev, Knyaz Əmiraslanov, Rza Məmmədov, Nail Nağıyev.
AFFA nümayəndəsi: Rauf Hüseynli.
Hakim-inspektor: Əhmədağa Cabbarov.
“Xəzər Lənkəran” mərkəzi stadionu.
20:00. “Rəvan” – “Zirə”
Hakimlər: Ramil Diniyev, Nahid Əliyev, İsgəndər Əliyev, İnqilab Məmmədov.
AFFA nümayəndəsi: Elbrus Abbasov.
Hakim-inspektor: Məhəmməd Məmmədov.
Bakı. “Bayıl Arena”.
23 noyabr (bazar ertəsi)
17:00. “İnter” - AZAL
Hakimlər: Rəvan Həmzəzadə, Mehman Mahmudov, Coşqun Həsənov, Munis Abdullayev.
Əlavə köməkçi hakimlər: Rəhim Həsənov, Fariz Yusifov.
AFFA nümayəndəsi: Mübariz Hüseynov.
Hakim-inspektor: Vüsal Əliyev.
Bakı. “İnter Arena”.
Bombardirlər:
5 - Riçard Almeyda ("Qarabağ"), Ruslan Qurbanov ("Neftçi"), Aleksey Antonov ("Qəbələ").
4 - Aleksey Qay ("Qəbələ"), Samuel Armenteros ("Qarabağ"), Junior Osvaldo ("Kəpəz"), Rahid Əmirquliyev ("Xəzər Lənkəran").