Rahid Əmirquliyev: Belə davam etsə, ən yaxşısı oynamamaqdır
"Xəzər Lənkəran"ın yarımmüdafiəçisi Rahid Əmirquliyev Topaz Premyer Liqasının 13-cü turu çərçivəsində "Neftçi"yə qarşı keçirdikləri oyundan (0:2) sonra azerisport.az saytının suallarını cavablandırıb.
- Məğlubiyyətlə bağlı nə deyə bilərsiniz?
- Səkkiz il idi doğma meydanda bakılılara uduzmurduq. Yaxşı futbol göstərib, qələbə qazanmaq istəyirdik. Amma gördüyünüz kimi, bizdə heç nə alınmadı.
- Birinci hissədə layiqli mübarizə aparsanız da, ikinci yarıda heç nə ilə yadda qalmadınız. Səbəb nə idi?
- Deyə bilmərəm. Oyunun videoyazısına baxıb, səbəbləri müəyyənləşdirməyə çalışacağıq. Bir şeyi dəqiq bilirəm ki, belə davam etmək olmaz. Hər oyunda uduzuruq. Azarkeşlərimiz yanvara kimi dözməlidir. Ondan sonra isə vəziyyət düzəlməlidir. Bu, bizə yaraşmır. Belə dəstəklə biz daha yaxşı oynamalıyıq.
- Şəxsən bu vəziyyət sizi yorub?
- Bütün bunlar psixoloji cəhətdən bizə pis təsir edir. Çünki komandanın əksər üzvü gənclərdir. Hər oyunda uduzmaq bezdirir. Özüm də yorulmuşam.
- Yanvarda doğrudan da hər şey düzələcək?
- Bunu ən yaxşısı klub rəhbərliyindən soruşun. Biz dəyişiklik olacağına ümidliyik. Belə davam etmək olmaz. Yeni ildə də belə davam etsə, ən yaxşısı oynamamaqdır.
- Belə olsa, klubu tərk edəcəksiniz?
- Müqaviləmin müddəti may ayında bitir. Yenə də ümid edirəm ki, hər şey yaxşı olacaq.