Rikardinyo: Qrupdan çıxmaq şansımız var, bunun üçün son iki matçda qalib gəlməliyik
"Qəbələ"nin müdafiəçisi Rikardinyo Avropa Liqasının qrup mərhələsi çərçivəsində Yunanıstanın PAOK klubuna qarşı keçiriləcək oyun öncəsi azerisport.az saytının suallarını cavablandırıb.
- Hazırlıq necə keçdi?
- Hər şey normal idi. Uşaqlar səylə məşq ediblər.
- Son nəticələr komanda üzərində çoxmu təzyiq yaradıb?
- Əlbəttə, müəyyən təsiri var. Amma bizi qarşıda tamamilə fərqli səviyyəli bir oyun gözləyir, nəinki çempionat görüşü. İrəli hərəkət etməli və son nəticələri unutdurmalıyıq. Həm də Avroliqa oyunlarında motivasiya daha güclü olur.
- Komandanızın qrupdan çıxmaq şanslarını necə görürsünüz?
- Şansımız var. Amma qrupdan çıxmaq üçün PAOK-a qalib gəlməyimiz, "Krasnodar"ın da "Borussiya"ya uduzması lazımdır. Son turda isə Rusiya klubunu öz meydanımızda məğlub etməliyik.
- Sizcə, son iki oyunda qalib gələ biləcəksiniz?
- Futbolda hər şey mümkündür. Amma bunun üçün özümüzü yaxşı tərəfdən göstərməyimiz lazımdır. Yalnız belə olan halda nəyəsə ümid edə bilərik. İstənilən halda indi PAOK-la görüşdə qələbə qazanmalıyıq. Əks halda hər şey mənasız olacaq.
- Heyətdə itkilər var. Dodo oynamayacaq, Dmitri Bezotosnı ilə Rafael Santosun oynaması da sual altındadır...
- Əlbəttə, uşaqlardan hansınınsa oynamaması sevindirmir. Mənim üçün komandamızın hər bir üzvü eynidir. Onların hər biri uğurumuzun bir hissəsidir.