Topaz Premyer Liqasında 14-cü tur həyəcanı
Bu gün Topaz Premyer Liqasında 14-cü tura start veriləcək. Azerisport.az xəbər verir ki, hesbat turu 4 gün davam edəcək.
İlk oyun günündə bir görüş baş tutacaq. "Kəpəz" doğma meydanda "İnter"i qəbul edəcək. Bu rəqibinə 5 oyundur uduzmayan “İnter” son 4 qarşılaşmada qalib gəlib. Gəncə təmsilçisi isə son iki ev oyununda xal qazana bilməyib. Bütövlükdə bu klublar 19 dəfə üz-üzə gəliblər. Onlardan yalnız 4-də gəncəlilər qalib gəlibsə, 2 dəfə heç-heçə qeydə alınıb. Qalan 13 görüşdə bakılılar qələbəyə seviniblər. Top fərqi də paytaxt klubunun xeyrinədir - 39:18. İlk dövrədə Bakıda baş tutan görüşdə 1:0 hesabıyla qalib gələn "İnter" səfərdə də oxşar uğura imza atmağa çalışacaq. Çünki bu, paytaxt təmsilçisinin ikinci pillədəki mövqeyini qoruması baxımından çox vacibdir. Amma Şahin Diniyevin çalışdırdığı "Kəpəz" də sıradan rəqib deyil və xüsusilə Gəncədəki qarşılaşmalarda rəqiblərinə müqavimət götərməyi yaxşı bacarır.
İkinci oyun günündə öncə AZAL “Sumqayıt”la qarşılaşacaq. Tərəflər arasındakı ardıcıl 3 matçda heç-heçə qeydə alınıb. Elə ilk dövrədə Sumqayıtda keçirilən oyun da 1:1 hesabıyla başa çatmışdı. AZAL indiyədək öz meydanında sumqayıtlılara uduzmayıb. Bakılılar son 5 qarşılaşmada da məğlubiyyət tanımır. AZAL-ın son 3 ev oyununda hər iki komanda qol vurub. Əvvəlki 17 oyunda daha çox heç-heçə qeydə alınıb - 8 dəfə. 6 qarşılaşmada bakılılar, 3-də isə sumqayıtlılar qalib gəliblər. Top fərqi də şüvəlanlıların xeyrinədir - 24:18. Tərlan Əhmədovun komandası doğma meydandakı qəbul edəcəyi rəqibini məğlub yola salmağa çalışacaq. Lakin Samir Abasovun gəlişindən sonra inamlı çıxışı ilə seçilən sumqayıtlıların da bu görüşdə mütləq qələbə qazanmağa çalışacağı şübhəsizdir.
Günün digər oyununda “Zirə” “Xəzər Lənkəran”ı qəbul edəcək. Komandalar ilk dəfə cari mövsümdə görüşüblər. Yeganə qarşılaşmada “Zirə” minimal hesabla qalib gəlib - 1:0. Rəqiblər ilk dəfə Bakıda görüşəcək. Şübhəsiz ki, zirəlilər bu görüşdə favorit hesab olunurlar. Çünki gənclərin ümidinə qalan və heyətlə bağlı ciddi problemlər yaşayan cənubluların güclü rəqibinə müqavimət göstərməsi, xal alması ehtimalı çox azdır. Son turda heç kimin gözləmədiyi halda "Rəvan"a uduzan Adil Şükürovun komandası üst pillələrdəki mövqeyini qorumaq üçün mütləq qələbə qazanmaq istəyəcək. Yunis Hüseynovlu "Xəzər Lənkəran"ın isə hətta 1 xal da qazanması da uğur sayıla bilər.
Bazar günü də bir görüş baş tutacaq. Lider və son çempion "Qarabağ" səfərdə “Neftçi” ilə üz-üzə gələcək. Azərbaycan çempionatlarının daimi iştirakçıları 62-ci dəfə qarşılaşacaq. Əvvəlki 61 oyundan 17-də "Neftçi", 20-də isə "Qarabağ" qalib gəlib. Daha 24 görüşdə heç-heçə qeydə alınıb. Top fərqi də ağdamlıların xeyrinədir - 60:58. “Neftçi” 9 oyundur “Qarabağ”a qalib gəlmir. Bakılılar bu qarşılaşmalarda cəmi 4 xal əldə edib. Ağdamlılar sonuncu dəfə 2013-cü il mayın 4-də məğlub olub. “Qarabağ” son 3 səfər oyununda qalib gəlib. İlk dövrədə keçirilən görüşdə 1:1 hesablı heç-heçə qeydə alınmışdı. Bu oyunda Ağdam klubu favorit hesab olunsa da, son turda səfərdə "Xəzər Lənkəran"a qalib gəlmiş Əsgər Abdullayevli "Neftçi"dən də sürpriz gözləmək olar.
Nəhayət, turun qapanış matçında “Qəbələ” “Rəvan”la münasibətlərinə aydınlıq gətirəcək. Bu klublar indiyə qədər 9 oyunda qarşılaşıblar ki, onun 6-da qəbələlilər, 2-də isə bakılılar qalib gəliblər. 1 görüşdə də heç-heçə qeydə alınıb. Top fərqi də "Qəbələ"nin xeyrinədir - 19:8. “Rəvan” son 6 qarşılaşmada qalib gəlməyib. Ardıcıl 2 qələbə qazanan “Qəbələ” son iki ev matçında qol buraxmayıb. Son dövrlər çempionatda qələbəyə həsrət qalan Roman Qriqorçukun komandası uğursuz gedişata son qoymağa çalışacaq. Amma Bəhmən Həsənovun komandası da son iki turda "Neftçi" və "Zirə"yə qalib gəlməklə asan rəqib olmadığını isbatlayıb. Baxmayaraq ki, ilk dövrədə Bakıda keçirilən görüşdə "Qəbələ" 3:0 hesablı darmadağına imza atmışdı.
Topaz Premyer Liqası
14-cü tur
27 noyabr (cümə)
14:00. “Kəpəz” - “İnter”
Hakimlər: Rəhim Həsənov, Munis Abdullayev, Nahid Əliyev, Ziya Nəsirov.
AFFA nümayəndəsi: Şaiq Həmidov.
Hakim-inspektor: Şahin Cəfərov.
Gəncə şəhər stadionu.
28 noyabr (şənbə)
14:30. AZAL - “Sumqayıt”
Hakimlər: Əliyar Ağayev, Zeynal Zeynalov, Vaqif Musayev, Mehman Mahmudov.
Əlavə köməkçi hakimlər: Elvin Əsgərov, Ramil Əhmədov.
AFFA nümayəndəsi: Vaqif Davudov.
Hakim-inspektor: Rövşən Əhmədov.
Bakı. AZAL Arena.
16:30. “Zirə” - “Xəzər Lənkəran”
Hakimlər: Orxan Məmmədov, Elman Musayev, Vüqar Bayramov, Coşqun Həsənov.
Əlavə köməkçi hakimlər: Fariz Yusifov, İnqilab Məmmədov.
AFFA nümayəndəsi: Ramiz Abdullayev.
Hakim-inspektor: Kərim Ağayev.
Zirə İdman Kompleksinin stadionu.
29 noyabr (bazar)
17:00. “Neftçi” - “Qarabağ”
Hakimlər: Ömər Paşayev, Namiq Hüseynov, Mübariz Haşımov, Yaşar Abbasov.
Əlavə köməkçi hakimlər: Əliyar Ağayev, Rəhim Həsənov.
AFFA nümayəndəsi: Ramiz Mustafayev.
Hakim-inspektor: Xaqani Məmmədov.
Bakı. “Bakcell Arena”.
30 noyabr (bazar ertəsi)
17:00. “Qəbələ” - “Rəvan”
Hakimlər: Rauf Cabbarov, Azər Əsgərov, Vüsal Qənbərov, Rəvan Həmzəzadə.
AFFA nümayəndəsi: Məmmədəli Məmmədov.
Hakim-inspektor: Əli Hüseynov.
Qəbələ şəhər stadionu.
Bombardirlər:
6 - Riçard Almeyda ("Qarabağ").
5 - Ruslan Qurbanov ("Neftçi"), Aleksey Antonov ("Qəbələ"), Dieqo Martins ("İnter").