Topaz Premyer Liqasında 15-ci tur həyəcanı
Bu gün və sabah Topaz Premyer Liqasında 15-ci turun oyunları keçiriləcək. Azerisport.az xəbər verir ki, ilk oyun günündə üç görüş baş tutacaq.
Əsgər Abdullayevin gəlişindən sonra qələbələri sıralayan “Neftçi” bu tur “Zirə”ni qəbul edəcək. İkinci dəfə qarşılaşacaq komandaların ilk oyununda “Zirə” qalib gəlib. Evdə ilk dəfə rəqibini qəbul edəcək “Neftçi” qol vura bilmədiyi və xal almadığı komandayla görüşəcək. Belə ki, həmin görüşdə zirəlilər 2 cavabsız qolla qalib gəlmişdilər. Amma bu dəfə "ağ-qaralar"ın həmin məğlubiyyətin əvəzini çıxması daha inandırıcı görünür. Çünki "Neftçi" yeni baş məşqçisinin rəhbərliyi altında heç qapısından qol da buraxmır. Düzdür, "Zirə" də debütant olmasına baxmayaraq, çox iddialı təsir bağışlayır. Hər halda paytaxt klublarının duelinin maraqlı idman mübarizəsi şəraitində keçəcəyi şübhə doğurmur.
Bu oyunla eyni saatda “Xəzər Lənkəran” evdə “Qəbələ” ilə üz-üzə gələcək. Bu klublar indiyə qədər 27 dəfə qarşılaşıblar. Onların 13-də cənublular, 8-də qəbələlilər qalib gəliblər. Daha 6 görüşdə isə heç-heçə qeydə alınıb. Son 3 qarşılaşmada “Qəbələ” qalib gəlib. “Xəzər Lənkəran” iki oyundur qol vura bilmir. Top fərqində də lənkəranlıların üstünlüyü var - 36:30. Daha iddialı olan və güclü heyətə malik "Qəbələ" bu görüşdə də favoritdir. Baxmayaraq ki, bu komanda son dövrlər çempionatda qələbə sevinci yaşaya bilmir. Amma həm maddi, həm də heyətlə bağlı problemlərdən əziyyət çəkən cənubluların güclü rəqibindən xal alması çox çətin görünür. Yunis Hüseynovun komandası ilk dövrədə səfərdə 0:6 hesablı məğlubiyyətlə üzləşdiyindən, həmin görüşün qisasını almağa çalışacaq. Bu yolda hətta heç-heçə də cənublular üçün müsbət nəticə sayıla bilər.
İlk oyun gününün son matçında isə lider "Qarabağ”la əsas izləyicisi “İnter” qarşılaşacaq. Bu klublar əvvəllər 44 oyunda üz-üzə gəliblər. Onların 19-da ağdamlılar qalib gəliblər, 10-da bakılılar 3 xal qazanıb, 15 görüşdə isə heç-heçə qeydə alınıb. Top fərqi də ağdamlıların xeyrinədir - 49:28. “Qarabağ” son 20 qarşılaşmada bu rəqibinə cəmi 1 dəfə uduzub. Ağdamlılar son 5 oyunda da 1 dəfə qələbə qazanıb. “İnter” 8 ildir səfərdəki 13 matçda qalib gəlməyib. İlk dövrədəki oyunda da "Qarabağ" səfərdə 2 cavabsız qolla qalib gəlmişdi. Elə bu dəfə də ağdamlılar favoritdirlər. Amma paytaxt klubunun da sürpriz nəticəyə imza atması istisna olunmur.
Son oyun günündə iki qarşılaşma baş tutacaq. Öncə “Sumqayıt” “Kəpəz”lə münasibətlərinə aydınlıq gətirəcək. Bu komandaların əvvəlki oyunlarında (9 dəfə üz-üzə gəlibər) meydan sahibi olan tərəf məğlub olmayıb. “Sumqayıt” isə evdə ümumiyyətlə xal itirməyib. Yubiley qarşılaşması öncəsi sumqayıtlıların 4, gəncəlilərin 3 qələbəsi var. 2 dəfə isə heç-heçə qeydə alınıb. Top fərqində də sumqayıtlıların minimal üstünlüyü var - 12:11. Amma ilk dövrədə Gəncədə keçirilən qarşılaşmada "Kəpəz" 3:1 hesablı qələbəyə sevinmişdi. Samir Abasovlu "Sumqayıt" indi həmin məğlubiyyətin qisasını almağa çalışacaq. Şahin Diniyevin çalışdırdığı Gəncə təmsilçisi isə səfərdə hətta 1 xala da sevinə bilər.
Nəhayət, turun qapanış matçında “Rəvan”la AZAL qarşılaşacaq. Tərəflərin əvvəlki 13 oyununda hər iki komanda eyni sayda - 5 qələbə qazanıb. 3 qarşılaşmada isə qalib müəyyənləşməyib. Maraqlıdır ki, bu klubların vurduğu qol sayında da bərabərlik var - 17:17. Tərəflərin son 3 qarşılaşmasında 1-dən çox qol vurulmayıb. “Rəvan” son 7 qarşılaşmada yalnız 1 qələbə qazanıb. AZAL son iki, “Rəvan” öz meydanındakı axırıncı 2 matçda qol buraxmayıb. İlk dövrədəki oyunda isə "təyyarəçilər" 1:0 hesabıyla üstün olmuşdular. Amma Bəhmən Həsənovun gəlişindən sonra yüksəlişə keçən "aslanlar" bu dəfə həmin məğlubiyyətin qisasını ala bilərlər.
Topaz Premyer Liqası
15-ci tur
6 dekabr (bazar)
16:00. “Xəzər Lənkəran” - “Qəbələ”
Hakimlər: Ömər Paşayev, Yaşar Abbasov, Akif Əmirəli, Vaqif Musayev.
Əlavə köməkçi hakimlər: İnqilab Məmmədov, Ramil Əhmədov.
AFFA nümayəndəsi: Əsgər Əmirəliyev.
Hakim-inspektor: Şahin Cəfərov.
“Xəzər Lənkəran” mərkəzi stadionu.
16:00. “Neftçi” - “Zirə”
Hakimlər: Ramil Diniyev, Nahid Əliyev, Knyaz Əmiraslanov, Azər Əsgərov.
Əlavə köməkçi hakimlər: Elvin Əsgərov, Rauf Cabbarov.
AFFA nümayəndəsi: Mübariz Hüseynov.
Hakim-inspektor: Kərim Ağayev.
Bakı. “Bakcell Arena”.
18:30. “Qarabağ” - “İnter”
Hakimlər: Əliyar Ağayev, Zeynal Zeynalov, Rza Məmmədov, Munis Abdullayev.
Əlavə köməkçi hakimlər: Rəhim Həsənov, Orxan Məmmədov.
AFFA nümayəndəsi: Namiq Məstanov.
Hakim-inspektor: Gülağa Cabarov.
Bakı. Tofiq İsmayılov adına Suraxanı qəsəbə stadionu.
7 dekabr (bazar ertəsi)
17:00. “Sumqayıt” - “Kəpəz”
Hakimlər: Fariz Yusifov, Cavanşir Yusifov, Coşqun Həsənov, Ziya Nəsirov.
AFFA nümayəndəsi: Vaqif Davudov.
Hakim-inspektor: Məlik Həsənov.
Sumqayıt. “Kapital Bank Arena”.
20:00. “Rəvan” - AZAL
Hakimlər: Rəhim Həsənov, Namiq Hüseynov, Elman Musayev, Rəvan Həmzəzadə.
AFFA nümayəndəsi: Eldar Qasımov.
Hakim-inspektor: Xaqani Məmmədov.
Bakı. “Bayıl Arena”.
Bombardirlər:
6 - Riçard Almeyda ("Qarabağ").
5 - Ruslan Qurbanov ("Neftçi"), Aleksey Antonov ("Qəbələ"), Dieqo Martins ("İnter").