İlqar Qurbanov: Avropa Liqasında yolumuza davam etmək üçün əlimizdən gələni edəcəyik
"Qarabağ"ın müdafiəçisi İlqar Qurbanov Topaz Premyer Liqasının 15-ci turu çərçivəsində "İnter"ə qarşı keçirdikləri oyundan (1:0) sonra azerisport.az saytının suallarını cavablandırıb.
- Oyunla bağlı nə deyə bilərsiniz?
- Maraqlı oyun oldu. Hər iki komanda yaxşı müdafiə olunmağı bacarır. Fikrimcə, azarkeşlər üçün də maraqlı qarşılaşma alındı. Şadam ki, qol vurduq, qələbə qazandıq. Belçika səfəri öncəsi heç də asan qarşılaşma keçirmədik. Amma əsas odur ki, 3 xalı qazana bildik.
- Qələbə əsas izləyicilərinizdən bir qədər də uzaqlaşmağınıza kömək etdi...
- Biz buna fikir vermirik. Çünki ötən mövsüm də 12-13 xal öndə olduğumuz halda onu az qala əldən vermişdik. Sonralar fərq 3-4 xala enmişdi. Ona görə də fərq barədə düşünməməyə çalışırıq. Hər oyuna qələbə üçün çıxırıq.
- Amma etiraf edin ki, hazırda Premyer Liqada layiqli rəqibləriniz yoxdur. Sizə qarşı ən yaxşı oyunu "Neftçi" göstərdi...
- Düzdür, həmin oyunda uduzduq. Amma "Neftçi" ilə oyun artıq keçmişdə qalıb. Bütün komandalar bizə qarşı maksimum güclə oynayırlar. Buna görə bizə çətin olur. Üstəlik, biz Avropa Liqasında, ölkə kubokunda da oyunlar keçiririk. "İnter" də ağıllı oynadı. Amma biz diqqətli oynamağa və səhv buraxmamağa çalışdıq.
- Qarşıda Belçika "Anderlext"i ilə səfər oyunu var. Avrokubok yolunuza davam edə biləcəksiniz?
- Bunu hamımız çox istəyirik. Amma bizi çətin oyun gözləyir. Əlimizdən gələni edəcəyik ki, Avroliqada yolumuza davam edək.
- Brüsseldə meydana çıxacağınıza ümid edirsiniz?
- Baxacağıq. Mənə şans verilsə, tam gücümü meydanda qoymağa çalışacağam.
- Amma Qurban Qurbanov sizə Avroliqada təsadüfi hallarda güvənir. Bu, nə ilə bağlıdır?
- Bunun səbəbini bilmirəm. Əslində, xüsusi bir səbəb yoxdur. Kimin daha yaxşı olmasına baş məşqçi qərar verir. Lazım gəlsə, meydana çıxmağa hazıram. Bunu heç vaxt problem etməmişəm.
- Brüsseldə qələbə qazansanız da, İngiltərə "Tottenhem"inin Fransa "Monako"suna uduzmamasına ümid etməlisiniz...
- İngiltərə klubu əsas vəzifənin öhdəsindən gəlsə də, onların "Monako"ya məğlub olacağını düşünmürəm. Məsələn, hamı "Tottenhem"in Bakıya az qala üçüncü heyətlə gəldiyini düşünürdü. Amma onlar Bakıdan qələbə ilə qayıtdılar. Ona görə onların "Monako"ya asanlıqla uduzacağına da inanmıram. Çətin ki bu komanda öz azarkeşləri qarşısında uduzsun.
