Samuel Armenteros: İndi Anderlextin üzərində təzyiq və gərginlik var
"Qarabağ"ın hücumçusu Samuel Armenteros Topaz Premyer Liqasının 15-ci turu çərçivəsində "İnter"lə oyundan (1:0) sonra azerisport.az saytının suallarını cavablandırıb.
- "İnter"lə oyunu necə şərh edə bilərsiniz?
- Çətin oldu. Amma istəyimizə çata bildik. Başa düşürdük ki, bu rəqiblə oyun asan keçməyəcək. Çünki "İnter" güclü komandadır.
- Yəqin ki, hazırda hamınızı daha çox Belçika "Anderlext"i ilə Avroliqa oyunu düşündürür...
- Etiraf edim ki, "Anderlext"ə qarşı oynamaış həmişə istəmişəm. Bildiyiniz kimi, "Qarabağ"a qədər mən məhz bu klubda oynayırdım. Orada çoxlu dostlarım var. Onlar mənim oyunuma baxmağa gələcəklər.
- Belə çıxır ki, bu, sizin üçün böyük motivasiyadır...
- Bəli, elədir. Amma mən bu görüşə əsl peşəkar futbolçu kimi hazırlaşmalıyam. Bu görüşün vacibliyini başa düşürəm.
- "Anderlext"in sabiq futbolçusu olduğunuzu nəzərə alsaq, yəqin ki, rəqib barədə faydalı məlumatlarınız da olar...
- Əlbəttə. Mənim çoxlu tanışım var ki, onlardan qarşıdakı rəqiblə bağlı məlumat öyrənmək mümkündür. Amma onlar da futbolçudurlar.
- "Qarabağ"da bununla maraqlanan yoxdur?
- Komandamızın məşqçilər korpusu istənilən rəqibi yaxşı analiz etməyi bacarır. Onların məndən nəsə soruşmağa ehtiyacları yoxdur. Öz işlərinin öhdəsindən bunsuz da layiqincə gəlirlər.
- "Qarabağ"ın digər aparıcı futbolçusu - Reynaldo da vaxtilə "Anderlext"də oynamışdı. Siz onu layiqincə əvəz edə biləcəksiniz?
- Əlbəttə, gücüm daxilində əlimdən gələni edəcəyəm ki, komandamız uğur qazansın.
- Sizcə, "Anderlext"də indi hansı atmosfer hökm sürür?
- Fikrimcə, bu komandanın hazırda Belçika çempionatında birinci pillədə qərarlaşmaması onların üzərində təzyiq yaradır. Yəqin ki, bununla əlaqədar futbolçular arasında da gərginlik var.