Rahid Əmirquliyev: Böyük ehtimalla vətəndə qalacağam
"Xəzər Lənkəran"ın kapitanı Rahid Əmirquliyev Topaz Premyer Liqasının 15-ci turu çərçivəsində "Qəbələ"yə qarşı keçirdikləri oyundan (0:1) sonra azerisport.az saytının suallarını cavablandırıb.
- Oyunla bağlı nə deyə bilərsiniz?
- Pis oynamadıq. Sakitcə heç-heçəyə nail ola bilərdik. Bunun üçün qol vəziyyətlərimiz də oldu. Amma həmişəki kimi, yenə də onlardan yararlana bilmədik. Məğlubiyyətə baxmayaraq, gənc uşaqlar özlərini yaxşı tərəfdən göstərə bildilər. Belə davam etsələr, bu komandanın gələcəyi yaxşı olacaq.
- Komandanızın penali tələb etdiyi iki epizodla bağlı nə deyə bilərsiniz?
- Birinci epizodu dəqiq görmədim. Mənə elə gəlirdi ki, Elnur Cəfərov özünü yerə atıb. Amma təkrarda görünür ki, tam əksinədir. Hakim həmin epizodda penalti təyin edə bilərdi. İkinci hissədə isə "Qəbələ"nin futbolçusu cərimə meydançasında əllə oynadı. Hakim yenə də "nöqtə"ni göstərmədi. Bütün bunlar üç hakimin gözü qarşısında baş verib. Ola bilsin ki, hakimlər sadəcə, bizim xeyrimizə penalti təyin etmək istəmirdilər.
- Siz bunu qərəzli münasibət sayırsınız?
- Üç hakimin heç biri bunu görmür və ya görmək isəmirsə, belə fikirlər yaranır. Ümumiyyətlə, qapı xəttində qoyulan hakimlər nə üçündür? Onlar baş hakimə məhz belə epizodlarda yardım etməlidirlər. Hər bir insan səhv edə bilər. Ümid edirəm ki, bu qərarlar "Xəzər Lənkəran"a qarşı qərəz deyil.
- Rasim Ramaldanovun gedişindən sonra komandada atmosfer necədir?
- Şübhəsiz ki, bütün bunlar komandaya pis təsir göstərir. Mən də gedəcəyəm, amma bunu hiss etdirməməyə çalışıram. Üç oyun qalıb. Qalan oyunlarda komandaya kömək etmək üçün əlimdən gələni edəcəyəm.
- Gələcək iş yerinizi hələ müəyyənləşdirməməsiniz?
- Təkliflər olduğunu gizlətmirəm. Hələ qərar verməmişəm. Mövsümün ilk yarısı başa çatandan sonra qərar verəcəyəm. Böyük ehtimalla vətəndə qalacağam.
