Məhəmməd Mirzəbəyov: Zirə ilə oyunda bizə ancaq qələbə lazımdır
"Qəbələ"nin müdafiəçisi Məhəmməd Mirzəbəyov Topaz Premyer Liqasının 17-ci turu çərçivəsində "Zirə"yə qarşı keçirəcəkləri oyun öncəsi fikirlərini bölüşüb. Azerisport.az saytına açıqlamasında o, bunları söyləyib:
"Meydana qələbə üçün çıxacağıq. Bunun çətin olacağını bilirik. Amma bizə ancaq qələbə lazımdır. "Zirə" çox yaxşı komanddır. Onlar əks-hücumlarda yaxşı oynayırlar. Ev oyunlarında xüsusilə inamlı təsir bağışlayırlar".
Mirzəbəyovun sözlərinə görə, son turda "Neftçi"yə məğlub olmalarına baxmayaraq, komandada atmosfer yaxşıdır: "Neftçi"yə qarşı normal oynadıq. Hələ ilk hissədə qol vurmaq üçün şanslarımız oldu. Amma futbol elə bir oyundur ki, sən vurmayanda rəqib bunu həyata keçirir. Niyə qol vura bilmirik? Heç özüm də bilmirəm. Hərdən adama elə gəlir ki, top sadəcə, qapıya daxil olmaq istəmir. Həm də "Neftçi" bizə qarşı qapalı futbol sərgilədi. Belə şəraitdə qol vurmaq heç də asan deyil. Komandamız yaxşı məşq edir, məşqçi və futbolçu heyəti nəticə qazanmaq üçün əlindən gələni edir. Komandada hər şey normaldır. Amma digər komandaların bəxti gətirdiyi halda, bizdə tam əksinədir. Ümid edirəm ki, tezliklə hər şey qaydasına düşəcək".