Vüqar Mustafayev: Biz hər şeyə hazır olmalıydıq
"Qarabağ"ın yarımmüdafiəçisi Vüqar Mustafayev Topaz Premyer Liqasının 17-ci turu çərçivəsində "Sumqayıt"a qarşı keçirdikləri oyundan (2:2) sonra azerisport.az saytının suallarını cavablandırıb.
- "Sumqayıt"a qalib gələ bilməməyinizə nə mane oldu?
- Maraqlı oyun alındı. "Sumqayıt" son dövrlər yaxşı formadadır. Bizim kifayət qədər qol epizodlarımız oldu. Amma onlardan yararlana bilmədik. "Sumqayıt" isə bizi əks-hücumlarda tutdu. Bizə çoxlu problem yaratdılar.
- Rəqibin erkən qolu sizin üçün çoxmu gözlənilməz oldu?
- Diqqətsizlikdən qol buraxdıq. Baxmayaraq ki, hər şeyə hazır olmalıydıq. Futbolda hər şey çox sürətlə dəyişir.
- Bəzi epizodlarda "Qarabağ"ın oyunçularının yorğun olduğu diqqət çəkirdi...
- Xeyr, yorğun deyildik. Sadəcə, bizdə hər şey alınmadı. Çoxlu qol epizodu yaratdıq. Amma rəqibin qapıçısı əksər epizodlarda çox yaxşı oynadı.
- Sizə elə gəlmir ki, "Qarabağ" kimi komanda bu qədər qol epizodunu boşa verməməlidir?
- Nə etmək olar? Hər istəyə nail olmaq mümkünsüzdür.
- "Qarabağ" məğlubiyyətdən son anda yaxa qurtardı. Yəqin ki, matçın sonlarında artıq qələbə qazana bilməyəcəyinizlə barışmışdınız...
- Matç 90 dəqiqə davam edir. İstənilən an hər şey dəyişə bilərdi. Biz üçüncü qolu da vurmağı çox istəyirdik. Amma görünür qismətimiz elə bir xal imiş.
- 2015-ci ilin son oyununda "Qəbələ"yə qarşı oynayacaqsınız...
- Çətin oyun olacaq. Bizim üçün hər bir oyun vacibdir. Rəqibin kimliyinin önəmi yoxdur. Allah eləsin ki, uğur bizim tərəfimizdə olsun.
- "Qəbələ" son dövrlər uğursuz çıxış edir. Bu, sizin işinizi asanlaşdırır?
- Çempionatımızda asan oyun olmur. Mən deməzdim ki, "Qəbələ"nin uğursuz çıxışı bizim işimizi asanlaşdıracaq.