Kamal Bayramov: Zirənin uğurlu çıxışını davam etdirməsini istəyirəm
"Zirə"nin qapıçısı Kamal Bayramov Topaz Premyer Liqasının 17-ci turu çərçivəsində qarşılaşdıqları "Qəbələ" ilə oyundan (1:0) sonra azerisport.az saytının suallarını cavablandırıb.
- "Qəbələ" üzərindəki qələbəni necə şərh edərdiniz?
- Matçın ağır keçəcəyini bilirdik. Elə də oldu. Amma buna baxmayaraq, qalib gəlməyi bacardıq. Bu matçın önəmini başa düşürdük. Şadam ki, qələbə qazana bildik.
- Son dövrlər "Qəbələ"nin uğursuz çıxış etməsi sizin üçün üstünlük yaratdı?
- "Qəbələ"nin heyətində çoxlu yaxşı futbolçu var. Fikrimcə, onlar sadəcə, psixoloji baxımdan yorğundurlar. Biz isə sonadək mübarizə aparıb, qalib gəldik.
- "Xəzər Lənkəran" üzərində qələbə, "Neftçi" və "Qarabağ"la heç-heçə, "Qəbələ" üzərində qələbə. Komandada nə baş verir?
- Hər şey öz axarı ilə gedir. Biz bütün bu uğurlara görə ancaq ulu tanrıya minnətdar olmalıyıq. Uğurlarımızın digər səbəbi isə mehriban və döyüşkən kollektivimizin olmasıdır.
- Artıq üçüncü oyundur ki, əsas heyətdə meydana çıxırsınız və cəmi bir qol buraxmısınız. Öz səviyyənizi göstərirsiniz?
- Heç kimə nəyisə göstərmək fikrində deyiləm. Öz komanda yoldaşlarımla birgə uğurlu çıxışımızı davam etdirməyimizi istəyirəm. Anar Nəzirov zədəlidir. Ona da tezliklə sağalmağı arzulayıram. Gücüm daxilində komandamızın uğur qazanması üçün əlimdən gələni edəcəyəm. Heç bir çətinlik yoxdur.
- Qarşıdakı turda sizi ilin son oyunu - AZAL-la görüş gözləyir...
- Onların oyunu gündən günə yaxşılaşır. Tərlan Əhmədov demək olar ki, sıfırdan komanda formalaşdırıb. Düzdür, onların maliyyə problemləri var. Amma komanda döyüşkəndir, hər matçda yaxşı futbol göstərirlər. AZAL-la oyunumuz çox çətin olacaq.
- Hazırda ikinci olan "Zirə" "Qarabağ"la çempionluq uğrunda mübarizə aparmağa hazırdır?
- Bizim əsas hədəfimiz yaxşı döyüşkən komanda yaratmaq idi. Əlbəttə, biz də ancaq uğurlu nəticə qazanmaq üçün oynayırıq.