Rəşad Sadiqov: Qəbələ mövsümün qalan hissəsində daha yaxşı oynayacaq
"Qəbələ"nin yarımmüdafiəçisi Rəşad Sadiqov Topaz Premyer Liqasının 18-ci turu çərçivəsində "Qarabağ"a qarşı keçirdikləri oyundan (1:1) sonra azerisport.az saytının suallarını cavablandırıb.
- "Qəbələ" ilin son matçında da qələbə qazana bilmədi. "Qarabağ"la qarşılaşdığınızı nəzərə alsaq, bu heç-heçəni qənaətbəxş saymaq olar?
- Liderə qarşı oynayırdıq. "Qarabağ" çox yaxşı komandadır. İki il ardıcıl ölkə çempionu olub. Buna baxmayaraq, biz layiqli oyun sərgilədik. Maraqlı oyun alındı. Hesabda 1:0 öndə olarkən penaltidən də yararlana bilsəydik, qələbə qazanardıq. Düzdür, rəqibin də qol epizodları var idi. Fikrimcə, heç-heçə də pis nəticə deyil.
- 2015-ci ili "Qəbələ" üçün uğurlu saymaq olar?
- Mən komandanın çıxışına yaxşı qiymət verərdim. Çünki ötən mövsümü üçüncü pillədə başa vurduq. Ardından Avropa Liqasının qrup mərhələsinə vəsiqə qazandıq. Düzdür, indi komandamız qara zolağa düşüb. Amma bunu aradan qaldıracağıq.
- Bəs son uğursuzluqların səbəbini nədə görürsünüz?
- Avropa Liqasındakı çıxışımız təsirini göstərdi. Biz Avroliqada var gücümüzü qoyurduq. Həmin oyunlardan sonra çempionat matçlarına köklənmək çətin idi. "Qarabağ"da da elə idi. Onlar da Avroliqa oyunlarından sonra az xal itirmədilər. Amma mövsümün qalan hissəsində daha yaxşı oynamağa çalışacağıq.
- "Qarabağ"la oyunda çox erkən qol vurmağınız çıxışınıza nə dərəcədə təsir göstərdi?
- Qoldan sonra biz də oyunumuzu əks-hücumlar üzərində qurduq. Növbəti qolları vurmaq üçün şanslarımız var idi. Bir daha qeyd edirəm ki, penaltini vursaydıq, hər şey fərqli olacaqdı. Amma biz vura bilmədik, "Qarabağ" isə əksinə, daha da ruhlanıb, hesabı bərabərləşdirdi.
- Sizə elə gəlmir ki, Dodo penaltini yerinə yetirərkən tələsdi?
- Bunu ən yaxşı Dodonun özü bilər.
- "Qəbələ"də hələ də Cavid Hüseynovun qayıdışını gözləyənlər var?
- Əlbəttə. O, komandaya lazımdır.