Amil Yunanov: Hər oyuna qol vurmaq üçün çıxıram
"Sumqayıt"ın yarımmüdafiəçisi Amil Yunanovun azerisport.az saytına müsahibəsi
- "Sumqayıt" Topaz Premyer Liqasının 18-ci turu çərçivəsində "Rəvan"la (3:3) heç-heçə etdi. Komandanız bu oyunda iki dəfə hesabda önə keçdiyi halda, sonda özü məğlubiyyətdən qaçmasına sevindi...
- "Rəvan"la oyun çox maraqlı və gərgin keçdi. "Rəvan" yaxşı komandadır. Son turlarda yaxşı çıxış edirdi. Matça ciddi hazırlaşmışdıq. Oyuna da yaxşı başladıq. Amma ikinci hissədə çıxışımız o qədər də yaxşı alınmadı.
- Qələbə qazanmağınıza nə mane oldu?
- Yəqin ki, yorğunluq. Həmçinin azlıqda qalmağımızın da təsiri oldu.
- Bu oyunda siz də iki qol vurdunuz...
- Şadam ki, qol vurmağa nail oldum. Amma mənim üçün komandamın qələbə qazanması daha vacibdir.
- 4 oyuna 6 qol vurmusunuz. Bunu gözləyirdiniz?
- Bəli, öz gücümə inanırdım. Hər oyuna qol vurmaq üçün çıxıram. Çünki hər bir futbolçunun hədəfi qol vurmaqdır, qələbə qazanmaqdır. Mənim də hədəfim qol vurmaqdır.
- Bəs niyə siz Premyer Liqanın ilk turlarından belə çıxış etmirdiniz?
- Tez-tez zədə alırdım. Bundan əlavə, "Qəbələ"dən gedəndən sonra mənimlə heç bir klub maraqlanmırdı. Bu üzdən də birinci divizionda çıxış etmək məcburiyyətində qalmışdım.
- Vurduğunuz altı qoldan hansı sizin üçün daha yaddaqalan oldu?
- "Qarabağ"a vurduğum qol. Çalışacağam ki, qış fasiləsindən sonra da qollar vurum. Əsas bunu çox istəmək və üzərimdə daha çox çalışmaqdır.
- Aparıcı klubların sizə diqqəti artıb. Təklif almamısınız?
- Xeyr. Heç bu barədə düşünmürəm də. "Sumqayıt"da qalmağı, bu komandada möhkəmlənməyi və klubuma kömək etməyi düşünürəm.
- "Sumqayıt"ın çempionatın ilk iki dövrəsindəki çıxışını necə qiymətləndirərdiniz?
- Yaxşı oynadıq. Sadəcə, bəzi oyunlarda bəxtimiz gətirmədi. Belə olmasaydı, daha çox xal toplayardıq.
