Qədirov: Qarabağ çox üstün olsa da, onları indidən təbrik etmək tezdir
Azərbaycanlı futbol mütəxəssisi Vladislav Qədirov geridə qalan 2015-ci il üçün ölkə futbolunu dəyərləndirib. Azerisport.az saytına açıqlamasında o, öncə bunları söyləyib:
"İlk növbədə Azərbayxan xalqını Dünya Azərbaycanlılarının Həmrəyliyi günü və Yeni İl münasibəti ilə təbrik edirəm. Düzünü deyim ki, 2015-ci il mənim yadımda xüsusi nə iləsə yadda qalmadı. Amma iki klubumuzun Avropa Liqasının qrup mərhələsində çıxış etməsi çox sevindirici oldu. Azərbaycan yığmasının İtaliya ilə Bakıdakı görüşü də yaddaqalan hadisələrdən idi. Komandamız adlı-sanlı rəqibinə qarşı çox yaxşı oynadı".
Qədirov geridə qalan ilin ən yaxşı futbolçusunun da adını açıqlayıb: "Mən ötən ilin futbolçusu adına Elnur Cəfərovu layiq görərdim. "Xəzər Lənkəran"ın gənc hücumçusu doğrudan da istedadlı futbolçudur. O, mənim diqqətimi hələ üç il öncə U-16-da çıxış edərkən çəkmişdi. Öz üzərində daha çox çalışsa, güclü futbolçu olacaq. Əsas əldə etdikləri ilə kifayətlənməyib, daha çox əziyyət çəkməsidir".
Həmsöhbətimizin sözlərinə görə, Topaz Premyer Liqasının cari mövsümü əvvəlki illərlə müqayisədə geri qalır: "Fikrimcə, Premyer Liqamızın səviyyəsi doğrudan da düşüb. Bunun üçün elə əvvəlki mövsümlərlə müqayisə aparmaq yetərlidir. Əvvəllər birinci yer uğrunda minimum 5 komanda mübarizə aparırdı. Amma indi vəziyyət elədir ki, digər komandalar "Qarabağ" səviyyəsində çıxış edə bilmirlər. Baxmayaraq ki, hələ geridə sadəcə, mövsümün yarısı qalıb".
"Qəbələ"nin nəsə etməyə çalışdığını görürük. Amma "Qarabağ"ın bu üstünlüyü əldən verəcəyinə inanmıram. Çempionatımızın səviyyəsinin enməsinə səbəb maliyyə problemləridir. Axı biz nə vaxt "Neftçi"nin maliyyə probleminə görə ölkə xaricinə getməkdən imtina etdiyini görmüşük? Özü də bu çətinliklərlə əksər klublarımız üzləşib. Əlbəttə, hələ qarşıda çox oyun var. Bu üzdən "Qarabağ"ı indidən təbrik etmək tezdir. Amma bu komandanın oyunu onu göstərir ki, "Qarabağ" digər rəqiblərinin hamısından çox üstündür".
Qədirov yeni illə bağlı arzularını da dilə gətirib: "Azərbaycan futboluna 2016-cı ildə də uğurlar arzulayıram. Ümid edirəm ki, yığma komandamız və klublarımız bizi uğurlu nəticələri ilə sevindirəcəklər".
