Elşən Abdullayev: Neftçini Qarabağla oyunda heç-heçə də qane etməyəcək
"Neftçi"nin yarımmüdafiəçisi Elşən Abdullayev Topaz Premyer Liqasının 21-ci turu çərçivəsində "Xəzər Lənkəran"a 1:0 hesabıyla qalib gəldikləri oyundan sonra azerisport.az saytının suallarını cavablandırıb.
- Oyun barədə nə deyə bilərsiniz?
- İlk növbədə rəqibin oyununu qeyd etmək istərdim. Onlar 90 dəqiqə çox yaxşı müdafiə olundular. Onların belə oynayacağını gözləmirdik. Biz isə öz növbəmizdə çoxlu qol epizodu yaratsaq da, onların cəmi birindən, həm də görüşün sonunda yararlana bildik. Şadam ki, uğurumuzda pay sahibi ola bildim. Rəqibi də sərgilədiyi oyuna görə təbrik edirəm.
- Qolu vurandan sonra formanızı çıxardınız və sarı vərəqə aldınız. Buna çox ehtiyac var idi?
- Biz qolu çox gec vurduq. Yəqin ki, buna görə vurulan qolu belə böyük coşqu ilə qeyd etdik. Formamı çıxaranda sarı vərəqə alacağımı gözləmirdim. Bunu qəsdən etməmişdim. Həm də komandamızın prinsipial rəqibinə qol vurmuşdum.
- Lənkəranda keçirilən son oyunda da qol vurmuşdunuz. Özünüzü "Böyük oyun"ların qəhrəmanı hesab etmirsiniz?
- Qələbəni tək mən yox, bütövlükdə komandamız qazanır. Mənim də bu uğurlarda payım varsa, buna ancaq sevinə bilərəm. Amma özümü qəhrəman hesab etmirəm.
- "Xəzər Lənkəran"ın gənclərdən ibarət heyətlə "Neftçi"yə qarşı bu cür mübarizə aparmasını sizin zəif çıxışınızla bağlı olduğunu demək olar?
- Bizim üçün rəqibin heyətində hansı yaşda futbolçuların çıxış etməsinin fərqi yoxdur. Bunda bir fərq görmürəm. Əlbəttə, "Xəzər Lənkəran"ın əvvəlki heyəti indi yoxdur. Amma oyun göstərdi ki, istənilən rəqibə hörmətlə yanaşmaq lazımdır.
- "Neftçi"nin "Rəvan" və "Xəzər Lənkəran"la oyunlarda inamsız çıxış etdiyini nəzərə alsaq, "Qarabağ"la görüşdən nə gözləyirsiniz?
- "Qarabağ" çempionatın lideridir. Bu komanda ilə oyunda uğur qazanmaq üçün maksimum güc sərf etməliyik. Yeganə fikrimiz qələbə qazanmaqdır. Bizi hətta heç-heçə də qane etməyəcək.