Rəşad Sadiqov: Əliyar Ağayevin penaltini görməməsi gülməli idi
"Qəbələ"nin kapitanı Rəşad Sadiqov Azərbaycan kubokunun yarımfinal mərhələsi çərçivəsində "Neftçi"yə qarşı keçirdikləri oyundan sonra jurnalistlərin suallarını cavablandırıb. Azerisport.az sizi həmin müsahibə ilə tanış edir:
- Oyun barədə nə deyə bilərsiniz?
- Rəqibin ilk dəqiqələrdən hücum edəcəyini bilirdik. Ona görə də topu onlara vermişdik. Buna baxmayaraq, 3-4 qol şansımız oldu. Nəticədə, biz üstünlüyümüzü artırmaq əvəzinə, öz qapımızda qol gördük. İstənilən halda bu nəticə də cavab matçı öncəsi pis deyil.
- Sizcə, Aleksey Qayın epizodunda doğrudan da penalti var idi?
- Penalti var və Əliyar Ağayevin onu görməməsi gülməlidir. Qoy epizodun təkrarına baxıb, utansın.
- Az sonra sizi də meydandan qovdu...
- Əliyar sağ olsun, məni harada görür, qırmızı vərəqə göstərir. "Qarabağ"la oyunda da heç nədən "qırmızı" göstərmişdi. Halbuki, həmin epizodda mənim meydandan qovulmağıma hətta Qara Qarayev də təəccüblənmişdi.
- Sizcə, hakimlər niyə "Qəbələ"yə qarşı belə səhvlər edirlər?
- Bu mövsüm çox hakim səhvi ilə üzləşmişik. Biz bu vaxta kimi heç nə demirdik. Amma bu artıq pik nöqtəsi oldu. Əliyar matçı birtərəfli idarə etdi. Hamı səhv edir. Lakin bu qədər çox olanda, onun təsadüfi olduğunu düşünmək düzgün deyil. Bir daha deyirəm ki, hakim də insandır, səhv edə bilər. Amma normanı keçəndə, vəziyyət fərqli olur.
- Nəticə oyuna görədir?
- Qələbə qazana bilərdik. Bu heç-heçəyə görə təəssüflənmirik. Qarşıda cavab matçı da var.
- Bəs komanda cavab maçtında kapitansız necə oynayacaq?
- Uşaqların mənsiz də öz işlərinin öhdəsindən gələcəyinə inanıram. Finala çıxmalıyıq. Premyer Liqada üçüncü və ya beşinci olmağın fərqi yoxdur. Biz kuboku qazanmaq istəyirik ki, mövsümü titulla başa vuraq.
