Aqil Məmmədov: Penalti yox idi
"Neftçi"nin qapıçısı Aqil Məmmədov Azərbaycan Kubokunun yarımfinal mərhələsi çərçivəsində "Qəbələ"yə qarşı keçirdikləri ilk oyundan (1:1) sonra azerisport.az saytının suallarını cavablandırıb.
- Oyun barədə nə deyə bilərsiniz?
- Pis oynamadıq. Qələbə qazanmaq istəyirdik. "Qəbələ" yaxşı komandadır. Ona görə də bu rəqibə qalib gəlmək heç də asan deyil. Hər iki komandanın birdən artıq qol vurmaq şansı var idi. Əsl finala layiq matç idi. Ümid edirəm ki, cavab oyununda istədiyimiz nəticəni qazana və finala çıxa biləcəyik.
- Rəqib qələbəyə daha çox yaxın idi. Bəxtinizin gətirdiyini demək olar?
- Birinci hissədə bir qədər donmuşduq. 1:1 pis nəticə deyil. Qəbələdəki oyunda da yaxşı çıxış etməliyik.
- Düzünü deyin, siz Aleksey Qayı cərimə meydançasında kobudluqla dayandırdınız?
- Hakim təyin etməyibsə, deməli, penalti yox idi.
- Amma təkrarda sizin aşkar şəkildə qaydanı pozduğunuz görünür...
- Xeyr. Penalti yox idi. Mən topa oynamışdım, Qay isə özü mənim ayağıma toxunub yıxıldı.
- Rəqib futbolçulara qarşı çox aqressiv idiniz...
- Mənim yerimə siz də olsaydınız, aqressiv olardınız.
- Bu mövsüm doqquz sarı vərəqə almısınız. Heç müdafiəçilər bu qədər sarı vərəqə almırlar...
- Bəli, bu, çoxdur. Heç kimi vurmamışam. Mən sadəcə, öz komandamın maraqlarını qorumağa çalışmışam. Jurnalistlərə bir sualım var. Kim hər mətbuat konfransında soruşur ki, Aqil Məmmədovu niyə meydana buraxırsınız? Dostcasına soruşuram. Mənə sadəcə, maraqlıdır. Bu jurnalistə nə pislik etmişəm ki? Sual vermək ayrı məsələdi, amma hər dəfə eyni sualı vermək başqa. Mən jurnalistlərə ağıl öyrətmək fikrində deyiləm. Amma bircə onu demək istəyirəmki, mən də azərbaycanlıyam.
- 1:1 hesabı daha çox "Qəbələ"yə sərf edir. Razısınız?
- Təhlükəli nəticədir. Amma mənim üçün ilk oyun 0:0 hesabıyla bitib. Çətin olsa da, "Qəbələ"ni keçəcək gücdəyik. Səfərdə qol vurmalıyıq.
- Cavab matçı öncəsi "Qəbələ" ilə çempionat matçına da çıxacaqsınız. Bir rəqibə qarşı ardıcıl üç oyun keçirmək darıxdırıcı olmayacaq?
- Bunun nəyi pisdi ki? Qəbələnin təmiz dağ havasını alacağıq (gülür). Amma ciddi olsaq, belə qrafiklə oynamaq bir qədər təsir edir.