Rəşad Sadıqov: Zirə ilə matç şayiələrin əsassız olduğunu isbatladı
"Qarabağ"ın kapitanı Rəşad Sadıqov Topaz Premyer Liqasının 32-ci turu çərçivəsində "Zirə"yə qarşı keçirdikləri oyundan (2:0) sonra azerisport.az saytının suallarını cavablandırıb.
- Növbəti çempionluğunuzu necə şərh edərdiniz?
- Mənim üçün çox çətin mövsüm alındı. Heç bir rəqibimiz müqavimətsiz xal vermədi. Buna görə də arxayınlaşmağa vaxtımız olmadı. Bu gün çempionluğun taleyini həll etmək istəyirdik. Şadam ki, buna nail olduq.
- Matçdan öncə belə bir məlumat yayılmışdı ki, sizin "Zirə" ilə yaxşı münasibətiniz olduğu üçün rəqibə qalib gəlməyəcəksiniz...
- "Qarabağ" heç vaxt heç kimə güzəştə getməyib, bundan sonra da belə etməz. Rəqib hətta mənim qardaşım da olsa. Yayılan söhbətlərin nə dərəcədə əsassız olduğunu isə oyun bir daha isbatladı.
- Növbəti hədəf "qızıl dubl"a imza atmaqdır?
- Qarşıda "İnter"lə cavab matçı var. Ondan sonra bu barədə danışarıq.
- Budəfəki çempionluğun asan başa gəldiyini demək olar?
- Deməzdim. Sadəcə, biz daha təcrübəli olmuşuq. Əvvəlki iki mövsümün sonuna yaxın arxayınlaşırdıq və rəqiblər bundan istifadə edib, xal fərqini azaldırdılar. Bu mövsüm isə buna imkan vermədik.
- Razısınız ki, "Qarabağ"ın çempionatımızda layiqli rəqibi yoxdur?
- Xeyr, razı deyiləm. Kiminsə oyunu alınır, kiminsə yox. Ola bilər ki, növbəti mövsümdə də bizim oyunumuz istədiyimiz kimi alınmasın.
- Çempionluğu necə qeyd edəcəksiniz?
- Çempionluğu qeyd etməyə heç vaxt yoxdur. Mövsüm hələ başa çatmayıb. Qarşıda kubokun yarımfinal mərhələsinin cavab oyunu var. Daha sonra isə milli komandamızın Avstriya toplanışına yollanacağıq.