Ruslan Qurbanov: İlk dəfə karyeramda belə bir qol vurdum
"Neftçi"nin hücumçusu Ruslan Qurbanov Topaz Premyer Liqasının 32-ci turu çərçivəsində "Qəbələ"yə qarşı keçirdikləri səfər oyunundan (2:2) sonra azerisport.az saytının suallarını cavablandırıb:
- Matçla bağlı nə deyə bilərsiniz?
- Matç bizim üçün yaxşı alındı. Yaxşı oynadıq. Təəssüf ki, qələbə qazana bilmədik. Amma bu, futboldur. Hazırda bütün diqqətimiz kubok oyununa yönəlib. "Qəbələ" ilə yarımfinalın cavab matçı bizim üçün çox önəmlidir. Mənə elə gəlir ki, bu komandaya qarşı keçirdiyimiz son oyundan razı qalmaq olar. Qarşıdakı görüşdə də uğurlu çıxış etmək istəyirik.
- Bu oyunda çox gözəl qol vurdunuz. Həmin epizodda komanda yoldaşınıza ötürmə də verə bilərdiniz. Niyə zərbə vurmağa üstünlük verdiniz?
- Düzünü deyimki, heç komanda yoldaşımı görmürdüm. Sadəcə, məşqdə belə zərbələrə çox üstünlük verirdim. oyunda da sınamağa qərar verdim və nəticədə belə bir qol alındı. Doğrudan da gözəl qoldur. Karyeramda ilk dəfə belə qol vururdum.
- Qəbələdəki hakimlik xoşunuza gəldi?
- Heç şərh etmək belə istəmirəm. Sözüm yoxdur.
- Kubokun cavab matçında da 2:2 hesablı səfər heç-heçəsinə nail olsanız, "Qəbələ"ni keçib, finala çıxacaqsınız (ilk yarımfinal matçı 1:1 bitib). Sizcə, çempionatda altıncı yeri tutmaqla avrokuboklara vəsiqə qazanmaq asandır, ya kubokun finalında qalib gəlməklə?
- Bizim üçün hər iki turnir çox vacibdir. Amma biz öncə kubokun finalına vəsiqə qazanmağa, daha sonra isə çempionatda uğur əldə etməyə çalışacağıq.
- Cavab matçında uğur qazanacağınıza inanırsınız?
- Biz ilk oyunda da uğura inanırdıq. "Neftçi"də çıxış edən hər bir futbolçu böyük potensiala malikdir. Sadəcə, bu mövsüm nədənsə bəxtimiz gətirmir. Hər şeyə rəğmən, nəticə qazanmaq üçün əlimizdən gələni edirik.
- Matçdan sonra Müşahidə Şurasının üzvləri və icraçı direktor Elnur Məmmədov paltardəyişmə otağına gəldi. Onlar sizə nə dedilər?
- Matça görə bizə təşəkkür etdilər. Artıq kubok oyununa köklənmək lazım olduğunu söylədilər. Rəhbərlik bizə həmişə inanır və dəstəkləyir. Biz də onların etimadını doğrultmağa çalışırıq.