Kazbek Tuayev: Qarabağ qarşısında belə tələb qoymaqla təzyiq yaratmaq lazım deyil
AFFA İcraiyyə Komitəsinin üzvü Kazbek Tuayevin azerisport.az saytına müsahibəsi
- "Qarabağ"ın ardıcıl üçüncü çempionluğu barədə nə deyə bilərsiniz?
- Bu münasibətlə Qurban Qurbanovu, Elçin Rəhmanovu, Elxan Həsənovu, Zaur Tağızadəni və Müşviq Hüseynovu təbrik edirəm. Həmçinin Rəşad Sadıqovu. Uşaqlar yaxşı çalışdılar. "Qarabağ" bütün mövsüm ərzində baxımlı futbol sərgiləməsini görmək xoşdur.
- Sizə elə gəlmir ki, "Qarabağ"ın bu hegemonluğu hələ bir neçə il də davam edəcək?
- Hadisələri qabaqlamaq fikrim yoxdur. Növbəti mövsümdə hər şey baş verə bilər.
- Ağdamlılardan yeni mövsümdə Çempionlar Liqasının qrup mərhələsinə vəsiqə qazanmaq gözlənilir...
- Bu artıq başqa səviyyədir. Komanda qarşısına belə tələblər qoymaqla təzyiq yaratmaq lazım deyil. Qoy komanda hazırlaşsın və hədəflərinə tədricən, pillə-pillə yaxınlaşsın. Yeri gəlmişkən, komandanın sona dörd tur qalmış çempionluğu təmin etməsi yaxşı oldu. Bu, ağdamlıların yeni avrokubok mövsümünə indidən rahat hazırlaşmasına imkan yaradacaq.
- Sizə elə gəlmir ki, intriqanın az olması çempionatımıza marağı azaldır? Eyni zamanda bu, "Qarabağ"ın avrokuboklardakı çıxışına da təsir göstərə bilər...
- İndi belə tendensiya bütün dünyada var. Fransa, İtaliya və Almaniyada baş verənlərə baxın. Erkən çempionluğa görə heç kim stadiona getməkdən imtina etmir. İstəsək də, istəməsək də, hazırda "Qarabağ"ın rəqibi yoxdur.
- Qurban Qurbanovla rəqabət apara biləcək məşqçimiz var?
- Axtarmaq, ad açıqlamaq fikrim yoxdur. Amma bu, yaxın gələcəkdə belə birisinin olmayacağı anlamına gəlmir. Bizdə ağıllı və savadlı mütəxəssislər çoxdur və hər an "açıla" bilərlər.
- Bəs "Qarabağ"ın digər rəqibləri barədə fikirləriniz necədir?
- "Zirə" əla mövsüm keçirir. Onların ikinci pillədə yer alması təsadüfi deyil. Sevimli "Neftçi"mə gəlincə, onu növbəti mövsümdə daha iddialı görmək istərdim. Bu klubda hazırda yenidənqurma işləri gedir. Orada yaxşı insanlar çalışır. Bu, özünü işdə də göstərməlidir.