Fərhad Vəliyev: Daha 1-2 il futbol oynamağa gücüm var
"Qarabağ"ın qapıçısı Fərhad Vəliyev Azərbaycan Kubokunun yarımfinal mərhələsi çərçivəsində "İnter"ə qarşı keçirdikləri cavab oyunundan (1:0, ilk oyun 4:0) sonra azerisport.az saytının suallarını cavablandırıb.
- Matçla bağlı fikirləriniz?
- Birinci oyunda 4:0 hesabıyla qalib gəlmişdik. Bu oyunda isə rəqibə uduzmamağa çalışırdıq. Şadam ki, vəzifəmizin öhdəsindən layiqincə gəldik və finala çıxdıq.
- "Qarabağ"ın finala çıxacağına ilk oyundan sonra onsuz da şübhə edən yox idi...
- Bəli, elədir. Amma cavab matçında da qələbə qazanmaq istəyirdk. Sonadək oynadıq və qələbə qazandıq.
- Çoxdan idi meydana çıxmırdınız. Sonuncu dəfə "Qarabağ"a hansı oyunda kömək etdiyiniz yadınızdadır?
- İkinci dövrədə ümumiyyətlə oynamamışam. Məşqlərdə üzərimdə çalışıram, özümü formada saxlamağa çalııram və şansımı gözləyirəm. İstənilən vaxt mənə də şans verilə bilər. Yaxşı formada idim və buna görə də matçı qol buraxmadan bitirdim.
- Hətta Vüqar Nadirovun penalti zərbəsini də dəf etdiniz...
- Bu, mənim işimdir. Vüqarla uzun illər bir yerdə oynamışıq. Mən onun hara zərbə vuracağını bilirdim. Ona görə də sağa tullandım. Məhz həmin küncə zərbə vuracağına inanırdım. Elə alındı ki, zərbəsini dəf edə bildim.
- Karyeranı başa vurmağı düşünmürsən?
- Xeyr, bu barədə düşünmürəm. Hələ daha 1-2 il oynamağa gücüm var.
- Yarım il öncə oynamaq istədiyinizi və buna görə "Qarabağ"dan gedəcəyinizi açıqlamışdınız. Qərarınızı qətiləşdirmisiniz?
- Düzünü desəm, Ağdam klubunda qalmaq istəyirəm. Qurban Qurbanovla söhbət edəcəyəm. Son sözü o deyəcək.
- Yerindən razısan?
- Əlbəttə, mən yerimdən həmişə razı olmuşam. Neçə ildir "Qarabağ"da oynayıram. Elə karyeramı da burada başa vurmaq istəyirəm.
- "Qarabağ"ın finaldakı rəqibi "Neftçi" olacaq...
- Neçə ildir ki, "Neftçi" ilə oyunlarımızın hər biri gərgin keçir. Bu mövsüm onlar turnir cədvəlinin üst pillələrində yer almasalar da, bu komanda həmişə iddialıdır. Fikrimcə, əla final olacaq.