Rizvan Fərzəliyev: İran və İspaniya yığmasından zəif deyilik
Futzal üzrə Azərbaycan yığmasının kapitanı Rizvan Fərzəliyevin azerisport.az saytına müsahibəsi
- Dünya çempionatının final mərhələsində İspaniya, İran və Mərakeşlə bir qrupda mübarizə aparacaqsınız...
- Çətin qrupa düşdük. Əlbəttə, belə bir turnirdə asan rəqib gözləməyə də dəyməzdi. Amma bizə lap güclü rəqiblər qismət oldu.
- Rəqibləri nə dərəcədə yaxşı tanıyırsınız?
- İspaniya yığmasını yaxşı tanıyırıq. Bir qitədə mübarizə apardığımıza görə, tez-tez onları iş başında görə bilirik. İranla son illərdə qarşılaşmamışıq. Amma oyunlarının videoyazısına baxmışam. Onlar çox güclüdürlər. Mərakeşli oyunçuları Hollandiya yığmasından tanımaq olar. Hansı ki, biz bu komanda ilə dünya çempionatına vəsiqə uğrunda pley-off oyunlarında qarşılaşmışdıq. Yalnız Mərakeş baxımından bəxtimiz bir qədər gətirdi. Ondan da güclü rəqiblə qarşılaşa bilərdik.
- Start matçımız da məhz Mərakeşə qarşı olacaq...
- Bax bu, ən yaxşı xəbərdir. Bu oyun bizim üçün həlledici olacaq. Qələbə qazansaq, qrupdan çıxmaq üçün əla şans yaxalayacağıq. Buna görə də mərakeşlilərə qalib gəlməyə borcluyuq. DÇ-də öz qruplarında üçüncü yeri tutan dörd ən yaxşı komanda da növbəti mərhələyə vəsiqə qazanır. Biz də ən azı bu şansdan yararlanmalıyıq.
- Deməli, üç xal da bəs edə bilər?
- Ola bilər. Amma digər oyunlarda böyük hesabla uduzmamaq lazımdır. Vurulan və buraxılan topların nisbəti vacib rol oynayır. Amma bizim hədəfimiz yalnız bu yolla qrupdan çıxmaq olmayacaq. İran və İspaniya dünyanın ən güclüləri hesab olunsa da, biz onlara qarşı da uğurlu oynamaq istəyirik. Ümid edirəm ki, Mərakeşə qarşı ilk oyundakı uğurlu nəticə bizim növbəti matçlara daha yaxşı köklənməyimizə şərait yaradacaq. Həm də biz ilk turdan sonra İran və İspaniyanı iş başında görəcəyik, necə oynadıqlarını biləcəyik. Özümüzü bu rəqiblərdən zəif saymırıq və onlarla rəqabət aparmağa hazırıq.
- Amma Azərbaycan yığması rəqiblərindən fərqli hazırda baş məşqçisizdir...
- Dünya çempionatının startına 3 aydan çox vaxt qalır. Vaxt nə çox, nə də az deyil. Rəhbərlik yaxın günlərdə öz seçimini edəcək. Uyğunlaşmaq baxımından problem olmayacaq. Yəqin ki, turnirə hazırlığa tez başlayacağıq. Yeni baş məşqçi həm də yeni taktika gətirəcək. Bunun üçün də çalışmalıyıq.