Fərhad Vəliyev: Finalda qapını mən yox, İbrahim Şehiç qoruyacaq
"Qarabağ"ın qapıçısı Fərhad Vəliyev Topaz Premyer Liqasının 36-cı turu çərçivəsində AZAL-a qarşı keçirəcəkləri oyun öncəsi azerisport.az saytının suallarını cavablandırıb.
- Mövsümün son oyunundan nə gözləyirsiniz?
- Doğma azarkeşlər önündə oynayacağıq. Buna görə də mövsümü qələbə ilə başa vurmaq istəyirik. "Rəvan"a da qalib gəlməyi planlaşdırmışdıq. Amma alınmadı. Ona görə də AZAL-la oyunda 3 xal qazanmağa çalışacağıq.
- "Rəvan" necə oldu ki, sizin 11 oyunluq qələbə seriyanıza son qoydu?
- Heç bir futbolçu, heç bir komanda uduzmağı istəməz. Amma biz "Rəvan"la oyunda məğlubiyyətdən qaça bilmədik. Qapımıza penalti təyin olundu, futbolçumuz qırmızı vərəqə ald. Bunlar oyunumuza təsirsiz ötüşmədi. Hesabı bərabərlşdirsək də, öz səhvimizdən daha bir qol buraxdıq.
- İkinci qolda sizin də səhviniz oldu. Oyundan sonra Qurban Qurbanov sizə iradını bildirdi?
- O, tək mənə yox, hamımıza irad bildirdi.
- "İnter"lə kubok oyununda penaltini qaytardığınız halda, "Rəvan"la görüşdə Ramazan Abbasov sizi məyus etdi...
- Mən düzgün istiqamət seçmişdim, Ramazanın zərbə vurduğu küncə tullandım. Amma bir qədər gecikdim.
- Bu mövsüm cəmi iki matçda meydana çıxmısınız. Az deyil?
- Çox azdır. Daha çox oynamaq lazımdır. Komandama kömək etmək üçün əlimdən gələni edirəm.
- AZAL-la oyundan sonra sizi "Neftçi" ilə kubokun final görüşü gözləyir. Sizi həmin oyunda da qapıda görə biləcəyik?
- Fikrimcə, görə bilməyəcəksiniz (gülür). Yəqin ki, ehtiyatda olacağam. Qapıda İbrahim Şehiç duracaq. Həmin oyunda da qələbəyə oynayacağıq. AZAL-a qalib gəlib, final matçına daha motivasiyalı çıxmaq lazımdır. Ümid edirəm ki, hər şey yaxşı olacaq.