Baçana Arabuli: Qəbələyə sürpriz etmək istəyirik
Avropa Liqasının birinci təsnifat mərhələsində "Qəbələ"nin rəqibi olan Gürcüstanın "Samtredia" klubunun hücumçusu Baçana Arabulinin azerisport.az saytına müsahibəsi
- "Qəbələ" ilə düşdüyünüzə görə təəssüflənmədiniz?
- Xeyr, hər şey normaldır. Səbrsizliklə matçları gözləyirik.
- "Qəbələ" barədə məlumatınız var?
- Bəli, var. Rəqib bizimlə müqayisədə təcrübəli komandadır. Onlar ötən mövsüm Avroliqanın qrup mərhələsində oynayıblar. Yaxşı heyətə malik olduqlarını da bilirəm.
- Oyunçularından kimi tanıyırsınız?
- Nika Kvekveskirini qeyd edə bilərəm. Onunla yaxşı dostluğumuz var. Nika doğrudan da güclü futbolçudur və "Samtredia" üçün ən təhlükəli oyunçulardan biridir.
- Yəqin ki, "Qəbələ"nin Gürcüstanda hazırlıq keçdiyini nəzərə alsaq, bu komandanı izləmək klubunuz üçün problem olmadı...
- Doğrudan da elədir. Onlar burada bizim klublarla yoxlama oyunları da keçirdilər.
- Rəqibdən çəkinmirsiniz?
- Ciddi hazırlaşırıq. "Qəbələ"nin Avroliqadakı oyunlarını görmüşəm. Çox çətin qrupa düşsələr də, yaxşı çıxış etdilər.
- Belə çıxır ki, "Qəbələ"ni güclü hesab edirsiniz?
- Əlbəttə. Axı ilk mərhələdəcə ötən mövsüm qrup mərhələsində oynamış komandaya qarşı mübarizə aparacağıq. Bu baxımdan rəqibimizi güclü sayıram.
- Azərbayanda çoxlu həmyerliniz çıxış edir. Rəqib barədə onlardan da məlumat almağa çalışmısınız?
- Xeyr. Heç bu barədə danışmamışıq.
- Ötən mövsüm "Qəbələ"nin ilk təsnifat mərhələsindəki rəqibi digər Gürcüstan təmsilçisi "Dinamo" idi. Maraqlıdır ki, siz də həmin dövrdə məhz Tiflis klubunda çıxış edirdiniz...
- Mən özüm də həmin oyunlar üçün sifariş edilmişdim. Qəbələdəki səfər oyununa da gəlmişdim. Amma meydana çıxmadım. Bizim üçün uğursuz oyun oldu.
- Cütün favoriti kimdir?
- Əlbəttə, "Qəbələ" favoritdir. Bu, şübhəsizdir. Amma biz Azərbaycan klubuna sürpriz etmək istəyirik. Bunun nə dərəcədə alınacağını zaman göstərəcək. İstənilən halda mərhələ keçə bilməsək, bunu böyük uğursuzluq saymaq olmaz. Amma biz mərhələ adlamaq istəyirik və buna çalışacağıq.