Bədavi Hüseynov: ÇL-in qrup mərhələsinə vəsiqə qazanmaqla xalqımızı sevindirmək istəyirik
"Qarabağ"ın müdafiəçisi Bədavi Hüseynovun azerisport.az saytına müsahibəsi
- Rusiya "Zenit"inə qalib gələcəyinizi az adam gözləyərdi...
- Bu görüşdə Avstriya "Vakker"i ilə matçla müqayisədə daha yaxşı oynadıq. Artıq komandada anlaşma səviyyəsi yüksəlib. Rəqib kifayət qədər güclü komanda idi. Hamı bilir ki, "Zenit" necə komandadır. Rusiyanın ən güclü klublarından biridir. Ona görə də bu görüşdə qələbə qazanmağı çox istəyirdik. Şadam ki, buna nail olduq. Lakin bu qələbəyə görə hansısa xüsusi sevinc hissi keçirdiyimizi deməzdim. İstənilən halda bu, bir yoxlama görüşü idi. Baxmayaraq ki, qələbə qazanmaq həmişə xoşdur.
- Bəs "Vakker"lə görüşdə buna niyə nail ola bilmədiniz ki?
- İlk oyunlar həmişə çətin olur. Komandamız matça yorğun çıxmışdı. Həmin oyunda xətlər arasındakı əlaqəni yaxşılaşdırmağa çalışırdıq.
- "Qarabağ" hələ ki, transfer bazarında passivdir. Arif Daşdəmirovdan başqa yeni transfer edilməyib. Belə çıxır ki, sizə yeni futbolçu lazım deyil?
- Arifin transferini müsbət addım hesab edirəm. O, təcrübəlidir, illərdir sabit oyun sərgiləyir, Avropa Liqasında oyun təcrübəsi var. Yeni transferlərə ehtiyac olub-olmamasına isə baş məşqçi qərar verir. Prinsipcə, bizdə indi də hər mövqe üzrə 2-3 futbolçu var.
- Çempionlar Liqasındakı ilk rəqibiniz - Lüksemburq "Düdelanj"ı barədə nə bilirsiniz?
- Öncə bu komanda barədə elə də məlumatlı deyildik. Amma tədricən məlumat toplayırıq. Son on ildə səkkiz dəfə çempion olublar. ÇL-də "Red Bull" kimi komandanı mübarizədən kənarlaşdırmağı bacarıblar. Ona görə də bu rəqibə qarşı ciddi hazırlaşmaq lazımdır. "Düdelanj" heç də sıradan rəqib deyil. Fikrimcə, bu mövsüm bizə ötən illə müqayisədə daha çətin olacaq.
- İlk oyun Bakıda olacaq. Tribunaların tam dolacağını gözləməyə dəyər?
- Avrokuboklardakı oyunlarımız az azarkeş gəldiyini xatırlamıram. Azarkeşlərimiz həmişə yanımızdadır. Ümid edirəm ki, "Düdelanj"la oyunda da stadionu dolduracaqlar. İlk oyunun Bakıda olmasının ciddi fərqi yoxdur. İstənilən halda hər iki oyunda müdafiədə diqqətli oynamalıyıq.
- "Qarabağ"ın asanlıqla üçüncü təsnifat mərhələsinə adlayacağını iddia edirlər. Mümkün uğursuzluğa necə ad vermək olar?
- Belə söhbətlər həmişə olub. Fikrimcə, şanslar bərabərdir. Ötən il Çernoqoriya "Rudar"ı ilə oyunları yaxşı xatırlayıram. Hamı bizim bu komandanı necə çətinliklə keçdiyimizi gördü. Qarşımıza həmişə maksimum hədəflər qoyuruq. Bu mövsüm də əlimizdən gələni edəcəyik ki, ÇL-in qrup mərhələsinə vəsiqə qazanaq. Azərbaycan xalqını sevindirmək istəyirik.
- Premyer Liqanın yeni mövsümdə 8 klubla keçirilməsi barədə qərarı necə qarşıladınız?
- "Xəzər Lənkəran" kimi komandanın çıxışını dayandırması üzücü oldu. Çempionatda cəmi 8 klubun qalması da xoşagəlməz məqamdır. Mən əksinə, klub sayının artacağını düşünürdüm. Ümid edirəm ki, qarşıdakı mövsümlərdə 12 klubla çempionat keçirilər.
- Komanda yoldaşınız Ansi Aqolli və onun formasını geyindiyi Albaniya yığmasının AÇ-dəki çıxışına necə qiymət verərdiniz?
- Ansini belə bir turnirdə görmək çox xoş idi. Albaniya yığması da çox layiqli mübarizə apardı. Kapitan sarğısı da Aqolliyə əbəs yerə verilməmişdi.
- AÇ-də kimə azarkeşlik edirsiniz və finalda kimləri görürsünüz?
- İtaliya və Almaniya daha güclü futbol sərgiləyir. Çox təəssüf ki, onlar 1/4 finalda üz-üzə gələcəklər. Onların oyunu finala layiq idi. İslandiyanı da izləmək maraqlıdır.