Tural Axındov: Daçiya keçiləsi rəqibdir
"Kəpəz"in kapitanı Tural Axundovun azerisport.az saytına müsahibəsi
- Avropa Liqasında qolsuz heç-heçə ilə başladınız. Bu heç-heçədən sonra Moldova "Daçiya"sı ilə səfər oyununuzdan nə gözləyək?
- Ola bilsin ki, komandamız səfərdə tam sərbəst oynaya bilməyəcək. Bu da normaldır. Amma biz ancaq qələbə qazanmaq üçün mübarizə aparacağıq.
- Sizə qollu heç-heçə də bəs edəcək. Buna çalışacaqsınız, ya qələbəyə?
- Bizi 1:0 hesablı qələbə tam qane edir.
- Bakıdakı görüşün nəticəsindən razı qaldınız?
- Yaxşı oynadıq. Sadəcə, qol epizodlarından yararlana bilmədik. İki-üç qol vura bilsəydik, Moldovada sakitcə öz oyunumuzu sərgiləyə bilərik. Ümid edirəm ki, istəyimizə səfərdə çatacağıq. "Daçiya" keçiləsi rəqibdir.
- "Kəpəz"in 16 il sonra avrokuboklara qayıtması həyəcan yaradırdı?
- Hamıda deyə bilmərəm, amma ümumi həyəcan var idi. Çünki uşaqların əksəri ilk dəfə avrokubok matçına çıxmışdı. Lakin 15-ci dəqiqədən sonra həyəcandan əsər-əlamət qalmamışdı.
- Rəqib komandanın üzvləri, xüsusilə prezidenti Adlan Şişxanov oyundan öncə iddialı açıqlamalar verirdi. Oyun zamanı da onunla komanda yoldaşınız Kərim Diniyev arasında insident yaşandı. Buna ilk müdaxilə edən isə siz oldunuz...
- Kərim topu ona qəsdən vurmadı. Mən həmin epizodu arxadan izləyirdim və hər şeyi görürdüm. Şişxanovun açıqlamalarına gəlincə, istədiyini deyə bilər. Biz sadəcə, onun fikirlərinə hörmətlə yanaşa bilərik.
- Şahin Diniyev oyundan öncə rəqibin çox güclü olduğunu desə də, meydanda bunun əksini gördük...
- Rəqib oyun baxımından bizdən üstün deyildi. Amma bu, səfərdəki oyunun da bizim üçün asan olacağından xəbər vermir. Səfərdə öz oyunumuzu sərgiləməliyik. Allah eləsin ki, qələbə qazanaq.
- "Dalğa Arena"ya elə də çox azarkeş gəlməmişdi. Bu, oyununuza təsir etdi?
- Əlbəttə, oyunun Gəncədə keçirilməsini çox istərdik. Orada oynasaydıq, hər şey tam fərqli olacaqdı. Amma Bakıdakı oyunumuza gələnlərin də birinə təşəkkürümü bildirirəm.