Bədavi Hüseynov: Kəpəz və Neftçinin də mərhələ adlayacağını düşünürdüm
"Qarabağ"ın müdafiəçisi Bədavi Hüseynovun azerisport.az saytına müsahibəsi
- ÇL-in üçüncü təsnifat mərhələsində Çexiya çempionu "Viktoriya"ya qarşı keçirəcəyiniz oyunlarda "Qarabağ"dan nə gözləyək?
- "Viktoriya" ikinci raundda mübarizədən kənarlaşdırdığımız "Düdelanj"dan ikiqat güclüdür. Çexlər bizə heç bir səhvi bağışlamayacaq. Bizim üçün səfərdəki ilk oyunda qol buraxmamaq çox vacibdir. "Viktoriya" təcrübəli komandadır. Ölkə çempionatında daim yüksək yerlər uğrunda mübarizə aparır. Bütün bunları nəzərə alsaq, bizi çətin oyunlar gözləyir.
- Lüksemburq "Düdelanj"ı ilə səfər oyununda hamı sizdən qələbə gözləyirdi. Amma siz məğlubiyyətdən çətinliklə yaxa qurtardınız...
- Gözlədiyimiz kimi, ağır oyun oldu. Rəqibin ilk dəqiqələrdən pressinq edəcəyini bilirdik. "Düdelanj"ın itiriləsi heç nəyi yox idi. Təəssüf ki, ilk yarıda istədiyimiz kimi oynaya bilmədik. Amma fasilədən sonra oyunumuzu düzəltdik, daha çox hücum etdik və sonda lazım olan qolu vurduq.
- Şehiç penaltini qaytara bilməsəydi, "Qarabağ" üçün hər şey daha pis nəticələnə bilərdi...
- Bəli, Şehiç penaltini qaytarmaqla uğurda pay sahibi oldu. Bizim üçün ilk yarıda qol buraxmamaq çox vacib idi. İkinci hissədə isə komandamız əls xarakter göstərdi.
- Hakimin penalti qərarı doğru idi?
- Müəyyən qədər şübhəli qərar idi. Rəqibə toxunuş var idi və o, özünü qazona atdı.
- Şehiçin penaltini dəf edəcəyinə inanırdınız?
- O, penaltidən bizi ilk dəfə xilas etmirdi. Bu dəfə də öz səviyyəsini göstərdi.
- "Qarabağ"ın hələ tam hazır olmadığını deyə bilərik?
- Bəli. "Düdelanj"la oyunlar da göstərdi ki, hələ üzərində çalışmalı olduğumuz çox iş var.
- Sizə elə gəlmir ki, "Düdelanj"ı keçə bilməsəydiniz, azarkeşlərin böyük narazılığı ilə üzləşəcəkdiniz?
- Buna nail olmasaydıq, hamı narazı qalacaqdı. Amma xoşbəxtlikdən mərhələ adlaya bildik.
- "Qarabağ"la yanaşı, avrokuboklarda mübarizəni yalnız "Qəbələ" davam etdirir...
- Çox təəssüf ki, "Kəpəz"lə "Neftçi" mərhələ adlaya bilmədi. Düzünü deyim ki, onların da Avroliqanın üçüncü təsnifat mərhələsinə vəsiqə qazanacağını düşünürdüm. Çünki onlar rəqiblərindən heç nədə geri qalmırdı. "Qəbələ"yə Fransa "Lill"i ilə mübarizədə uğurlar arzulayıram.