Gerhard Prqoni: Zirənin çempion olması çox çətin görünür
"Zirə"nin albaniyalı yarımmüdafiəçisi Gerhard Proqni Premyer Liqanın 3-cü turu çərçivəsində AZAL-a qarşı keçirdikləri oyundan (3:1) sonra azerisport.az saytının suallarını cavablandırıb:
- "Zirə" AZAL-a 3, siz 2 qol vurdunuz...
- Maraqlı matç alındı. Yaxşı futbol oynadıq.
- "Zirə" mövsümün ilk asan qələbəsini qazandı...
- Sizinlə razılaşmıram. Hər komandaya çətin olur. Bizim üçün də hər bir matç finala bərabərdir. Çünki hər qələbə 3 xal qazandırır. Rəqiblərimiz də bizə qarşı 100 faiz güclə mübarizə aparırlar.
- "Neftçi" və AZAL-a qalib gələn "Zirə" ilk turda "Sumqayıt"a niyə uduzmuşdu?
- Biz həmin matçda da çox yaxşı oynamışdıq. Amma futbolda bəzən bəxt gətirmir. Həmin oyunda da bəxtsizliklə üzləşdik. Həm də mən də daxil olmaqla komandada yeni futbolçular var. Bizə bir qədər vaxt lazımdır.
- Ötən mövsüm "Zirə" gümüş medal qazandı. Bu mövsüm çempion olmağınız nə dərəcədə realdır?
- Buna nail olmaq çox çətin görünür. Amma ən azından son mövsümdəki uğuru təkrarlaya bilərik.
- Bəs Premyer Liqada kimi favorit görürsünüz?
- "Qarabağ"la "Qəbələ" çox güclü təsir bağışlayır. Amma unutmayaq ki, futbol sürprizlərlə zəngin oyundur. Ola bilər ki, hansısa başqa komanda sürprizə imza atsın, çempion olsun.
- Albaniya çempionatı daha güclüdür, Azərbaycan Premyer Liqası?
- Bunu deyə bilmərəm. Amma mən Azərbaycan Premyer Liqasında özümü çox yaxşı hiss edirəm. Güclü çempionatdır.
- Azərbaycanda oynamış ən güclü albaniyalı futbolçu hansıdır?
- Ən yaxşısı Ansi Aqollidir. O, artıq bir neçə ildir həm "Qarabağ"da, həm də yığmamızda sabit oyun sərgiləyir.
- Onunla Bakıda görüşürsünüz?
- Əlbəttə, görüşürük, söhbətləşirik.
- "Zirə"nin süni örtükdə oynaması sizin üçün problem yaratmır?
- Düzünü desəm, süni qazon hər bir futbolçu üçün problemdir.
- Burada "Şkenderbeu"dakından daha çox qazanırsınız?
- Gəlin bu barədə danışmayaq (gülür). "Şkenderbeu" Albaniyada ən güclü klublardan biridir. Onlar ötən mövsüm ÇL-in qrup mərhələsində oynayıblar. Sadəcə, mənim ailəm, rəfiqəm Albaniyadan kənara çıxmağımı istəyirdi. Buna görə də Azərbaycana gəldim. Burada da özümü çox yaxşı hiss edirəm.