Millimiz Xorvatiyanı darmadağın etdi, İtaliyanı gözləyir
27 iyul 2011 14:30
Azərbaycanın kişi otüstü hokkeyçilərdən ibarət milli komandası dünən İtaliyanın Kataniya şəhərində keçirilən Avropa çempionatında ilk oyundaca qələbə qazanıb. Azerisport.az xəbər verir ki, "A" qrupunda yer alan milli komandamız Xorvatiya hokkeyçiləri ilə qarşılaşıb.
Heyətini kifayət qədər gücləndirən yığmamız deyəsən öz iddialarını reallaşdıra biləcək. Belə ki, qrupun fovaritlərindən sayılan xorvatlarla görüşdə Azərbaycan millisi rəqibini çox çətin vəziyyətə salıb. Matçın 22-ci dəqiqəsinə qədər rəqib qapısından 3 cavabsız qol keçirən həmyerlilərimiz birinci hissəni 4:1 hesabı ilə öz xeyrlərinə başa vurublar. Fasilədən sonra da meydanda yalnız Azərbaycan komandası "at oynadıb". Beləliklə, kişi hokkeyçilərimiz nəhayət ki, Avropa çempionatında ilk böyük hesablı qələbələrini qazanıblar - 6:2. Qolları Məhəmməd Salim Xalid (3), Məhəmməd Şabir (2) və Qəzənfər Əli vurublar.
Bu gün isə həmyerlilərimiz İtaliya komandası ilə qarşılaşacaq. Oyun Bakı vaxtı ilə saat 23.30 dəqiqədə başlayacaq. Hazırda "A" qrupunda hokkeyçilərimiz 3 xalla vahid liderdirlər. Xorvatiya təmsilçiləri 2, italiyalılar isə 1 oyundan 1 xalla sonrakı yerləri tuturlar. Milli komandamıza qrup lideri olmaq üçün bu gün meydan sahibləri ilə heç-heçə oynamaq da kifayətdi. Artıq indidən demək olar ki, yığmamız ən azı qrup 2-cisi olmaqla yarımfinalda mübarizə aparmaq hüququ qazanıb.
Xatırladaq ki, "B" qrupunda 2 oyundan sonra Portuqaliya və İsveçrə komandaları 4 xalla liderdirlər. Aktivində 3 xalı olan Cəbəllütariq hokkeyçiləri 3-cü sıradadırlar. Keçirdiyi hər 2 görüşdə məğlub olan slovakiyalılar qrup sonuncusudurlar. Bu gün bu qrupda da III turun oyunları ilə ilkin mərhələyə yekun vurulacaq.
