Azərbaycan AÇ-nin finalında İtaliya ilə üz-üzə
30 iyul 2011 17:48
İtaliyanın Kataniya şəhərində keçirilən Avropa çempionatı Azərbaycanın kişi otüstü hokkeyçilərdən ibarət milli komandası üçün uğurlu olub. Azerisport.az xəbər verir ki, artıq yığmamız finaldadı və növbəti mövsümdən qitənin II divizionunda mübasrizə aparmaq hüququ qazanıb.
Dünən “A” qrupunun qalibi olan həmyerlilərimiz digər qrupun 2-cisi - Cəbəllütariq hokkeyçiləri ilə pley-off matçında qarşılaşıblar. Fasiləyədək 2:0 hesabı ilə irəlidə olan millilərimiz prinsipial yarımfinal görüşünün ikinci yarısında da rəqibindən üstün hokkey nümayiş etdirərək yekunda 4:2 hesablı qələbəyə sahib olublar.
Digər yarımfinal cütündə italiyalılar İsveçrə təmsilçilərini 3:2 (3:0) hesabıyla məğlub ediblər. Beləliklə, neçə illərin istəyi nəhayət ki, reallaşıb. Ölkəmizin kişi otüstü hokkeyçilərdən ibarət milli komandası 2013-cü ildə iki ildən bir keçirilən Avropa çempionatının 2-ci səkkizliyində yarışacaq. Ancaq işlər belə getsə, elitada mübarizə aparmaq da çox uzaqda deyil. Bu axşam - Bakı vaxtıyla saat 23:30 dəqiqədə finalda İtaliya yığması ilə oyun rəmzi xarakterdən başqa heç bir prinsipiallıq daşımır. Onu da xatırladırıq ki, həmyerlilərimiz kimi Avropanın ən güclü 16 kollektivi sırasına çıxan İtaliya hokkeyçiləri ilkin qrup mərhələsində millimizlə birgə “A” qrupunda çıxış edirdi və bu rəqiblərin qrup oyununda hər iki tərəfi qane edən 2:2 hesabı qeydə alınmışdı. Ancaq bu gün komandamızın baş mükafata sahib olacağına inam böyükdü.
