Bakı-2015-in atletika üzrə meneceri Avropa Atletika Assosiasiyası tərəfindən mükafatlandırıldı
Bakı 2015 Avropa Oyunlarının Atletika yarışları üzrə meneceri Məhərrəm Sultanzadə Avropa Atletika Assosiasiyası tərəfindən məhsuldar əməyinə və fədakar fəaliyyətinə görə mükafata layiq görülmüşdür. Azerisport.az xəbər verir ki, cənab Sultanzadə şənbə günü axşam təşkil olunmuş “Golden Tracks” şam yeməyində mərasimə dəvət olunmuş qonaqların, o cümlədən, Beynəlxalq Atletika Federasiyaları Assosiasiyasının vitse-prezidenti Lord Sebastyan Konun qarşısında Avropa Atletika Məşqçisi Mükafatına layiq görülmüşdür.
Bu mükafat onun heyrətamiz bacarıqlarına və dünya miqyasında beynəlxalq məşqçi kimi bir sıra müxtəlif ölkələrdə əldə etdiyi nailiyyətlərə verilən qiymətdir.
Bakı 2015 Avropa Oyunları Əməliyyat Komitəsinin Əməliyyatlar üzrə Baş Direktoru cənab Saymon Kleq demişdir: ”Məhərrəm Avropa Oyunlarının təşkilində insanların qoyduğu irsin və onun insanların həyatını necə dəyişdirməsinin, onları təkmilləşməyə və yeni bacarıqları inkişaf etdirməyə ruhlandırmasının bariz nümunəsidir.”
”İdmançılarla məşqçilik işindən ofis mühitinə keçdiyi son doqquz ay ərzində Məhərrəm gördüyü hər bir işdə müvəffəqiyyət qazanmış və əvəzedilməz komanda rəhbərinə çevrilmişdir.”
“O, bu mükafata tam olaraq layiqdir və güc və təcrübəni özündə birləşdirən belə bir şəxsin burada, Bakı 2015 komandasında olması bizim üçün çox xoşdur.”
İlk dəfədir ki, Azərbaycanın milli məşqçisi Avropa Atletika Məşqçisi Mükafatına layiq görülür.
Cənab Sultanzadə demişdir: ”Avropa Atletika Assosiasiyası tərəfindən ölkəm və özüm üçün ilk dəfə olaraq bu cür möhtəşəm mükafat qazandığıma görə çox xoşbəxtəm və son dərəcə qürur duyuram. Bir məşqçi kimi mən yaxşı nəticələr qazanmış yüksək səviyyəli idmançılar hazırlamışam və son səkkiz ildə milli komandanın baş məşqçisi kimi çalışaraq həm Dünya, həm də Avropa səviyyəsində müsbət nəticələr göstərmişik.”
Cənab Sultanzadə, həmçinin, Milli Texniki Heyət səviyyəsinə çatmaları üçün bu yaxınlarda 150 nəfərə təlim keçmiş və iyun ayında Bakıda keçirilmiş və Avropa Federasiyası tərəfindən yüksək qiymətləndirilmiş Avropa Olimpiya Sınaq Yarışlarının Yarışlar üzrə Direktoru olmuşdur.
Şüvüllə tullanma üzrə Fransalı idmançı Renaud Lavillenie və qısa məsafəyə qaçış üzrə Hollandiyalı idmançı Dafne Şippers “Golden Tracks” təntənəli mükafatlandırma mərasimində İlin Avropa Atletləri adına layiq görülmüşlər.
Eyni zamanda, qısa məsafəyə qaçış üzrə Böyük Britaniyalı idmançı Adam Gemili və hündürlüyə tullanma üzrə Rusiyalı idmançı Mariya Kuçina “Rising Star” mükafatına layiq görülmüşlər.
