Bakı-2015 ulduz elçilərini təqdim etdi
Bakı-2015 Avropa Oyunları Əməliyyat Komitəsinin bu gün yaydığı məlumata əsasən Azərbaycanın ən məşhur incəsənət nümayəndələrinin bir neçəsi bu yay keçiriləcək ilk Avropa Oyunları üçün Ulduz Elçilər olacaqlar. Azerisport.az xəbər verir ki, çərşənbə axşamı Muğam Mərkəzində keçirilən təqdimat tədbirində musiqi, televiziya və incəsənət dünyasından 13 nəfər ulduzun adı açıqlanmışdır.
Sözügedən ulduzların sırasına müğənnilərdən Tünzalə Ağayeva, Röya, Avroviziya mahnı yarışmasının qalibləri Eldar Qasımov və Nigar Camal, Miri Yusif, komediya aktyorlarından Bəhram Bağırzadə, Rafael və Coşqun, Tahir və Cabir İmanovlar və musiqiçilərdən DJ Shock daxildir. Tanınmış aparıcılar Murad Dadaşov və İlkin Həsəni də bu sıraya aiddir.
Azərbaycan Respublikasının Gənclər və idman naziri və Bakı 2015 Avropa Oyunları Əməliyyat Komitəsinin Baş icraçı direktoru cənab Azad Rəhimov deyib: “Mən Oyunların rəsmi elçiləri olan bu möhtəşəm məşhurların dəstəyi ilə İlk Avropa Oyunlarının Açılış Mərasiminə 150 gün qalmasını qeyd etməkdən məmnunluq duyuram. Mən əminəm ki, bizim Ulduz Elçilərimiz azərbaycanlı gənclər arasında böyük həyəcan yaradacaq və daha çox insanı Oyunlara cəlb edəcək".
Adıçəkilən proqram Ulduz Elçilərin iyun ayının 12-də başlayacaq idman tədbiri haqqında müraciətlərini və mesajlarını bölüşmək məharətindən istifadə etməklə Bakı 2015 Avropa Oyunlarının Azərbaycan və Avropada geniş tamaşaçı kütləsinə çatdırılmasına imkan yaradacaq.
İştirakçılar Bakı 2015-in obyektlərinə baş çəkmək, gerisayım tədbirlərində iştirak etmək, kampaniyaları dəstəkləmək və öz sosial media kanallarından istifadə etməklə milyonlarla pərəstişkarları arasında Oyunların təbliğ olunmasına kömək göstərəcəklər.
Təqdimat tədbirində çıxış edən müğənni Tünzalə xanım Ağayeva qeyd edib: “Mən səhnədə çıxış edərkən gözəl ifa göstərmək üçün əlimdən gələni edirəm. İyun ayında Azərbaycan bütün Avropanın zövq alacağı unudulmaz bir şou nümayiş etdirəcək. Mən Bakı 2015 Avropa Oyunlarının Ulduz Elçisi olaraq könüllü proqramı kimi təşəbbüslər vasitəsilə Bakı 2015-ə qatılmaq üçün insanları ruhlandırmağa çalışacam və ölkəmiz üçün tarix yazılmasında iştirak edəcəm".
Bakı 2015 Avropa Oyunları Əməliyyat Komitəsinin Əməliyyatlar üzrə baş direktoru cənab Saymon Kleq əlavə edib: “Bu elan bizim elçi proqramımızın genişləndirilməsində növbəti addım və möhtəşəm idman yarışını həyata keçirmək üçün davam edən hazırlıq işlərimizin dinamikasına əlavədir. Biz göstərdikləri dəstəyə görə Ulduz Elçilərimizin hər birinə təşəkkür edir və qarşıdan gələn aylarda Bakı 2015 Avropa Oyunlarının təbliğ olunmasına kömək etmək üçün onlarla birlikdə işləməyi səbirsizliklə gözləyirik".
