Bakı 2015-də iştirak edəcək Cenkins yeddinci yerə yüksəlib
Britaniyalı idmançı Helen Cenkins idmana qayıdışını Keyp Taunda keçirilmiş triatlon yarışını 7-ci yerdə bitirməklə qeyd edib. Azerisport.az xəbər verir ki, İTU üzrə ikiqat dünya çempionu və ikiqat Olimpiya çempionu Cenkins Cənubi Afrikada Dünya Triatlon Seriyasında yarışmazdan əvvəl doqquz ay yarışlardan kənar qalmışdı. Qadınlar arasında keçirilmiş yarışı həmyerlisi Viki Holland Cenkinsdən 19 saniyə əvvəl, yəni 1 saat 49 dəqiqə 51 saniyəyə başa vurdu.
Cenkins Tvitterdə bunları yazıb: “Bu gün yenidən yarışa qatıldığıma görə çox məmnunam! Həqiqətən də geri qayıdana kimi, nə qədər darıxdığını insan təsəvvür edə bilmir”.
2008 və 2011-ci illərdə İTU üzrə dünya titulunu qazanmış bu 31 yaşlı idmançı əvvəllər dabaq fasiti, sonralar isə ayaq problemindən əziyyət çəkmişdi. O həm də dörd həftə ərzində qrip və kürək problemi səbəbindən də narahatlıq keçirmişdi.
Cenkins Bakı 2015-də yarışmaq üçün Britaniyanın Olimpiya rəsmiləri tərəfindən seçilib.
Amerika Birləşmiş Ştatlarından olan Keyti Zaferes Keyp Taundakı tədbiri ikinci yerdə başa vurub. O, yarışı Hollanddan bir saniyə gec tamamlayıb. Ondan sonra üçüncü yerə isveçrəli Nikola Spiriq layiq görülüb.
Holland Bakı 2015 üçün Britaniyanın triatlon komandasına hələ daxil edilməyib. Digər tərəfdən İsveçrənin triatlon komandasının siyahısı da açıqlanmayıb.
İspaniyanın üçqat Olimpiya çempionu Ainoa Muruanın Bakı 2015 üçün namizədliyi irəli sürülüb. O, Keyp Taunda yarışı 12-ci yerdə başa vurub. Azərbaycana gəlmək üçün seçilmiş İspaniya çempionu Miriam Kasilas isə yarışda 30-cu yerdə qərarlaşıb.
Kişilər arasında keçirilmiş yarışda Böyük Britaniyanın London 2012 Olimpiya çempionu Alister Braunli öz 18-ci triatlon qələbəsini qeyd edib. Mövsümün ilk yarışında Braunli görüşü 1 saat 39 dəqiqə 19 saniyəyə başa vurub. Ondan sonra ikinci yeri ispaniyalı Xavier Qomez Noya, üçüncü yeri isə fransalı Vinsent Lui qazanıb.
U23 üzrə İspaniyanın ikiqat dünya çempionu Fernando Alarza, Qomez Noyadan fərqli olaraq, Keyp Taunda beşinci yeri tutduğu üçün Bakı 2015-də yarışmaq hüququ əldə edib.
