Türk güləşçi Taha Akgül Bakı-2015-in elçisi oldu
Bakı 2015, Türkiyə çempionu, güləşçi Taha Akgülün 12 iyunda start götürəcək Birinci Avropa Oyunlarının İdman Elçisi seçildiyini açıqlayıb. Azerisport.az xəbər verir ki, 120 kq çəkidə sərbəst güləş üzrə Avropa və dünya çempionu Taha Akgül, ardıcıl olaraq, 2012, 2013 və 2014-cü illərdə öz çəkisində güləş üzrə Avropa çempionatında fəxri kürsünün ən yüksək pilləsinə qalxaraq qitə çempionu adını qazanıb. O, həmçinin, 2013-cü ildə güləş üzrə dünya çempionatında bürünc medalın sahibi olub.
Bakı 2015-in əməliyyatlar üzrə baş direktoru cənab Saymon Kleq dedi: “Biz, Taha Akgülü Bakı 2015-in beynəlxalq İdman Elçisi kimi salamlamaqdan məmnunuq. Birinci Avropa Oyunlarında onun kimi bacarıqlı və təcrübəli idmançıların iştirakı, iyun ayında necə mötəbər tədbirin şahidi olacağımızın mükəmməl sübutudur”.
“Tahanın bu günə qədər elə də uzun olmayan karyerası ərzində qazandığı müvəffəqiyyətlər, onun idmana verdiyi töhfəsini əks etdirir. Təmsil etdiyi idman növü üzrə Birinci Avropa Oyunlarının çempionu adını qazanmaq üçün yarışacağı günü səbirsizliklə gözləyirik”.
Bakı 2015-in İdman Elçiləri mübarizə apardıqları idman növünü təmsil edəcək, Avropa Oyunlarının təbliği üçün qitədə və sosial mediada aparılan marketinq kampaniyalarına qoşulacaqlar.
Atası və qardaşı da güləşçi olmuş Taha Akgül dedi: “Mən, Birinci Avropa Oyunlarının İdman Elçisi olduğum üçün çox həyəcanlıyam. Bir ay boyunca Bakıda mübarizə aparacağım günü səbirsizliklə gözləyirəm. Bakı 2015-də ölkəmi təmsil etmək mənim üçün şərəfdir və mən, mübarizə apardığım kateqoriya üzrə Birinci Avropa Oyunlarının çempionu olmaq üçün bütün gücümü səfərbər edəcəyəm”.
Türkiyə Olimpiya Komitəsinin prezidenti professor Uğur Erdener isə bunları bildirdi: “Taha çox uğurlu idmançıdır və onu Bakı 2015-in Elçisi kimi görməkdən məmnunam. Avropanın hər bir yerində Bakı 2015 Avropa Oyunlarını və güləşi təbliğ edərək mükəmməl iş görəcəyinə şübhə etmirəm”.
Taha Akgül, alman stolüstü tennisçi Dmitri Ovtçarov, yunan qılıncoynadan Vasiliki Vuguka, irland boksçu Keti Teylor, Böyük Britaniyanın taekvondo komandasının üzvü Ceyd Cons, fransız bədii gimnast Kseniya Mustafayeva, danimarkalı avarçəkən Rene Holten Pulsen və Serbiyanın Duşan Domoviç Bulut, Marko Savic, Marko Zdero və Dejan Majstoroviçdən ibarət 3x3 basketbol komandası, polşalı dağ velosipedçisi Maya Vloşçovska, italiyalı qılıncoynadan Nikolo Kampriani və Rusiyanın çimərlik futbolu idmançıları Andrey Buxlitski, İlya Leonov və Anton Şkarindən sonra, Bakı 2015-in növbəti beynəlxalq İdman Elçisi oldu.
Bakı 2015-in güləş yarışları, iyunun 13-dən etibarən, 6 gün ərzində Heydər Əliyev adına İdman Arenasında keçiriləcək və 480 idmançı, 24 medal uğrunda öz kateqoriyaları üzrə mübarizə aparacaqlar. Heydər Əliyev adına İdman Arenası, eyni zamanda, cüdo və sambo yarışlarına da ev sahibliyi edəcək.
Biletləri, Park Bulvar, 28 Mall və Metro Park alış-veriş mərkəzləri də daxil olmaqla, birbaşa Bakının 12 müxtəlif əlverişli nöqtəsində quraşdırılmış bilet satış məntəqələrindən yaxud www.baku2015.com/tickets internet səhifəsindən onlayn qaydada almaq olar.
