Kintero qələbələrini Bakıda davam etdirmək niyyətindədir
İspaniyanın Kata Federasiyasından illərlə uzaq qalan Damiyan Hüqo Kinteronun idmana dönüşü möhtəşəm olub. Azerisport.az xəbər verir ki, İspaniyanın argentinalı idmançısı hazırda Bakı 2015-də kata yarışlarının favoritlərindən biridir.
Yeddi il ərzində yarışlardan kənarda qalmağa məcbur olan Kintero 2011-ci ildə özünü toplayaraq məşqlərə geri dönüb.
Kintero 19 yaşında, üç müxtəlif yaş qrupu - gənclər, universitet və böyüklər üçün milli çempionatın qalibi olduqdan sonra məhşurluq qazanıb. O, ilk dəfə iştirak etdiyi Avropa çempionatında gümüş medal əldə edib, mövsümü dünya çempionatını 5-ci yerdə başa vurub.
Lakin bəzi problemlər üzündən yeddi il ərzində arxa planda qalan Kintero idmana dönməkdə israrlı olur: "Mən güclü insanam və aydın məqsədlərim var. 2011-ci ildə Avropa Çempionatında fərdi yarışlarda iştirak etdim və qızıl medal qazandım. Bu, mənim üçün möhtəşəm bir dövrün başlanğıcı idi. Çünki sonra daha çox sayda medal qazandım".
İlk Avropa Oyunlarının ən yüksək səviyyəli idmançısı Kintero qələbəyə real namizədlərdən biri sayılır. Onun mükafatları sırasına ötən il Bremendə keçirilən Dünya çempionatının komanda yarışlarında və bu il İstanbulda keçirilən Avropa Çempionatında qazanılan qızıl medallar da daxildir.
Kintero hesab edir ki, onun əsas rəqibləri 2014 Tamper Avropa Çempionatının finalında ona qalib gəlmiş Minh Dak (FRA), Matiya Busato (İTA) və bu il Avropa Çempionatının finalında onu məğlub edən Məhmət Yakan (TUR) olacaq.
