Neff qələbə maşınını işə salmağa hazırdır
Heç kəs bilməsə də, məhz Maya Vloşçovska bilir ki, qadınların dağ velosipedi yarışında isveçrəli sensasiya - Yolanda Neffin qarşısını almaq çətin olacaq. Azerisport.az xəbər verir ki, bu idmançıların hər ikisi Bakı 2015-in ilk qızıl medalına iddialıdırlar.
Qızlar son illər iki yarışda - Beynəlxalq Velosiped Təşkilatının (UCI) dağ velosipedi üzrə dünya kuboku yarışında və “Giant Pro” dağ velosipedi yarışında komanda yoldaşı olublar. Elə həmin vaxtlar yarışlar boyunca Maya həmkarı Yolandanın qələbə naminə inadkar əzminin günbəgün gücləndiyinin şahidi olub.
2003-cü və 2010-cu illərin dünya çempionu, Pekin 2008-in gümüş medalçısı polyak Vloşçovska onun uğurlarına sevindiyini deyir: "İki il əvvəl mən komanda lideri idim, keçən il isə o, lider oldu. İki il əvvəl Yolanda mənimlə mübarizə apara biləcək gücdə olduğunu aşkarladı. Qışdan sonra mən onun uzun və ağır təlim qaçışları ilə məşğul olduğunu görürdüm. O, çəkisini xeyli azaltmağa müvəffəq olub".
Öz növbəsində Yolanda Neff də Mayadan çox şey öyrəndiyini deyir. Keçən il 21 yaşında UCI dünya kuboku üzrə ən gənc velosipedçi olan idmançı son illərin seriya yarışlarında hər iki yarışın qalibi olan Vloşçovskanı güclü rəqib hesab edir:
"Ondan çox şey öyrənirəm, o, çox peşəkardır, mənə çox kömək edir. Eyni zamanda, çox təvazökardır. Biz 1 və 2-ci yerləri qazansaq, bu, çox möhtəşəm olardı. Bu, mənim ən böyük arzumdur. Biz hazırda komanda yoldaşı olmasaq da, dostluq edirik".
Dağ velosipedi üzrə bu şənbə keçiriləcək yarışlarda Neffin qızıl medal qazanacağı gözlənilir. Vloşçovska da bu proqnozlardan xəbərdardır və fəxri kürsünün digər pilləsinə qalxacağına ümid edir.
"İlk onluqda yerləşən qızlar arasında fərq çox kiçikdir. Fəxri kürsüyə hər hansı bir idmançı çıxa bilər", - deyə Vloşçovska qeyd edib.
