Albert Səlimov: Baku Fireslə müqavilə imzaladıqdan sonra Rusiya yığmasında aldığım məvacib kəsildi
Boks üzrə dünya və Avropa çempionu, "Baku Fires"un şərəfini qoruyan Albert Səlimov azerisport.az saytına müsahibəsində “Astana Arlans” klubu ilə görüşdən, Azərbaycan yığmasında çıxış etmək istəyindən və Rusiyanın buna qarşı olmasından danışıb.
- İlk olaraq “Astana Arlans” komandası ilə bağlı fikirlərinizi bilmək istərdik...
- Ümumdünya Boks Seriyasında ən güclü klublardan biridir. Bu komanda yaxşı boksçulardan formalaşıb. Qubadakı görüş bizim üçün özümüzü sübut etmək baxımından vacibdir. Kubaya uduzandan sonra azarkeşlər bizdən yalnız qələbə gözləyir. Qazaxıstan təmsilçisi hər zaman yaxşı boksçularla fərqlənib. Bununla belə bizim məqsədimiz qələbə qazanmaqdır.
- Cari mövsüm "Baku Fires" komandasının hədəfləri nə olacaq?
- Biz hər zaman yüksək hədəflər uğrunda mübarizə aparırıq. İlk olaraq qrupdan çıxmaq barədə düşünürük. Sonra isə finala qədər irəliləmək istərdik. Hissə-hissə bu barədə düşünəcəyik. Hazırkı hədəfimiz qalan qrup matçlarında qələbə qazanmaq və xal sayını artırmaqdır.
- Siz Azərbaycan millisində çıxış etmək istədiyinizi demişdiniz. Bu məsələ nə yerdədir?
- Azərbaycan tərəfi məni yığmada görmək istədiyini deyəndə razılaşdım. Fikrimcə heç bir problem qalmayıb. Klubun baş meneceri Rizvan Gənciyevə qərarımı açıqlamışam. Heç bir problem olmamalıdır. Mən hətta yanvarın 26-da start götürəcək Azərbaycan çempionatında iştirak etmək istəyirdim. Sadəcə "Bakı Fires"in çətin görüşləri qaldığından mənə icazə verilmədi. Məqsədim 2016-cı ildə keçiriləcək olimpiadaya lisenziya qazanmaqdır. Bakıda keçiriləcək Avropa Oyunlarında da iştirak etmək barədə düşünürəm.
- Axı Rusiya tərəfi səni Azərbaycan yığmasına buraxmayacaqlarını deyib...
- Rusiya tərəfi istədiyini deyə bilər. AİBA qanunları var. 3 illik fasilədən sonra boksçu başqa ölkənin şərəfini qoruya bilər. Çətin günlərimdə Azərbaycan klubu mənə dəstək oldu. Yığmada komandaya dəvət etdilər. Ən əsası mənə inandılar. Mən bu diqqətin qarşılığını verməliyəm. Hazırda bütün diqqətim klubuma, bundan sonra isə Azərbaycan yığmasına yönələcək.
- Rusiya tərəfi söyləyib ki, sənin Azərbaycan yığmasında iştirakın mümkün deyil. Onlar səni geri qaytarmaq istəyir...
- 8 il Rusiya yığmasının şərəfini qorumuşam. Dünya və Avropa çempionu olmuşam. Hər zaman Rusiya bayrağını yüksəltdiyim üçün fəxr etmişəm. Lakin mənə qarşı düzgün hərəkət etmədilər. "Baku Fires"la müqavilə imzalayan kimi Rusiya yığmasından aldığım məvacib kəsildi. Mənimlə maraqlanmadılar. Bəzilər hesab edir ki, Səlimov artıq ən yaxşı günlərini arxada qoyub. Amma bu belə deyil.
- Azərbaycan yığmasında çıxış etməyinlə bağlı sənədlər hazırdır?
- Əlbəttə. Gələn ildən yığmanın şərəfini beynəlxalq turnirlərdə qoruya biləcəyəm. Məşqləri davam etdirirəm. Çünki, hədəfə çatmaq üçün çalışmalıyam. Rusiyanın Vətənim olmasını qətiyyən unutmuram. Amma Azərbaycana mənə yaratdığı şəraitin və güvənməsinin əvəzini verməliyəm. Bu əvəzi yalnız qələbələrlə, yaxşı nəticələrlə vermək olar.
- Deyəsən, kimlərəsə özünü sübut etmək istəyirsən?
- Hamıya hörmətlə yanaşıram. Sadəcə bəzilərinə hələ tükənmədiyimi göstərmək istəyirəm. Gücüm olduğunu hiss edirəm. Olimpiadaya vəsiqə qazanmaq arzusundayam. Fərq etmir yığma turnirlərindən, yoxsa "Baku Fires"də lisenziya qazanacağam. Əsas 2016-cı ildə olimpiadada iştirak etməyimdir. Orada sözümü deyəndən sonra ola bilsin ki, karyeramı başa vurmaq barədə düşünüm.
