Baku Fires - Cuba Domaderos: heyətlər məlumdur
Yanvarın 31-də Meksikanın Mexiko şəhərində Ümumdünya Boks Seriyasının (WSB) 7-ci turun matçında Meksikanın “Mexico Guerreros” və Azərbaycanın “Baku Fires” komandaları qarşılaşacaq. Azerisport.az xəbər verir ki, meydan sahibləri 6 turdan sonra cəmi 2 xal toplayaraq, qrupda 5-ci yeri tuturlar.
“Baku Fires” isə 10 xalla 4-cü pillədədir. Qeyd edək ki, komandaların Quba Olimpiya Kompleksində keçirilən görüşündə komandamız rəqibi 5:0 hesabı ilə məğlub etmişdi.
Komandaların heyətləri artıq məlumdur:
Mexico Guerreros - Baku Fires
49 kq. Jozelito Altamirano - Məhəmməd İbiyev
56 kq. Brayan Qonsales Morales - Qairbek Qermaxanov
64 kq. Juan Romero - Salman İbrahimov
75 kq. Enri Saavedra Pinto - Soltan Migitinov
91 kq. Efetobor Apoçi - Vladimir Keleş
Bu dəfə komandamızın heyətində 20 yaşlı Salman İbrahimov debüt edəcək. Və iş elə gətirib ki, meksikalıların ən təcrübəli, güclü boksçusu məhz İbrahimovla qarşılaşacaq. Liqada 15 döyüş keçirən Juan Romero bunların 10-u qələbə ilə başa vurub. Meksikalı boksçu 2012-ci ildə WSB-nin fərdi yarışlarının qalibi olub.
Milli komandamızın üzvü Soltan Migitinov Meksikaya yollandığından ölkə çempionatında iştirak edə bilmir. Cari mövsümdə ilk döyüşünə çıxacaq London Olimpiadasının iştirakçısı venesuelalı Pinto ilə üz-üzə gələcək.
Qeyd edək ki, bu dəfə meksikalıların heyətində 2 legioner rinqə çıxacaq. Pintodan başqa nigeriyalı Apoçi “Baku Fires”in moldovalı boksçusu Vladimir Keleşin rəqibi olacaq. Keleş bu mövsüm ilk döyüşünü keçirəcək.
