Komandamız 14 medalla birinci oldu
14 may 2014 17:55
Bakı Olimpiya Kompleksində ümummilli lider Heydər Əliyevin xatirəsinə həsr olunmuş yeniyetmələr arasında beynəlxalq boks turnirinə yekun vurulub. Azerisport.az xəbər verir ki, 13 çəki dərəcəsi üzrə keçirilən yarışda 12 ölkənin 150 idmançısı mübarizə aparıb.
Turnirdə Azərbaycan boksçuları ilə yanaşı, Fransa, Finlandiya, Rusiya, Qazaxıstan, Macarıstan, Gürcüstan, Özbəkistan, Türkmənistan, Qırğızıstan, İrlandiya və Latviya idmançıları güclərini sınayıb. Komandamız yarışda 5 qızıl, 1 gümüş və 8 bürünc medala sahib olub. Boksçularımızdan Malik Həsənov (48 kq), Ramazan Abdullayev (50 kq), Elton Məmmədov (52 kq), Pərviz Quliyev (63 kq), Şamil Səfərəliyev (80+kq) fəxri kürsünün ən yüksək pilləsinə qalxıblar. Yalnız Ozcan Kərimov finalda Rusiya boksçusuna məğlub olaraq, gümüş medala layiq görülüb. Rauf Mansurzadə (48 kq), Şamil Məmmədov (52 kq), Mahir Mahmudov (57 kq), Ayxan Tağızadə (60 kq), Cavid Məmmədov (66 kq), Rasim Çobanlı (70 kq), Hacı Dilbazov (70 kq), və Məhəmməd Abdullayev (80+kq) bürünc medalla kifayətləniblər.
Ümumkomanda hesabında Azərbaycan 1-ci, Qazaxıstan 2-ci, Rusiya isə 3-cü yeri tutub. Qeyd edək ki, ulu öndər Heydər Əliyevin xatirəsinə həsr olunmuş yarış sentyabrda Rusiyanın Anapa şəhərində keçiriləcək Avropa birinciliyinə hazırlıq xarakteri daşıyıb.
