28 iyun 2012 02:26
İspaniya penaltilərlə finala çıxdı (YENİLƏNİB)
Sayca 14-cü Avropa çempionatı davam edir. Azerisport.az xəbər verir ki, Ukrayna və Polşanın birgə ev sahibliyi etdiyi turnirin 17-ci oyun günündə də bir qarşılaşma baş tutub.
Yarımfinal mərhələsinin ilk oyununda Portuqaliya və İspaniya üz-üzə gəlib. Qitə birinciliyinin əsas favoritlərindən hesab olunan ispanların portuqallarla görüşü maraqla gözlənilirdi. Çünki qalib gələn komanda AÇ-2012-nin ilk finalçısı adını qazanacaqdı.
Görüşün 90 dəqiqəsində qapılara qol vurulmayıb. Elə əlavə yarım saat ərzində də tərəflər istəyinə nail ola bilməyib. Belədə, qalibi penaltilər müəyyənləşdirib. Daha dəqiq olan son Avropa çempionları yenidən finala çıxıblar.
Maraq üçün xatırladaq ki, Portuqaliya qrup mərhələsində Almaniyaya 0:1 uduzsa da, Danimarkanı 3:2, Hollandiyanı 2:1 yenərək, pley-offa çıxmışdı. 1/4 finalda isə portuqallar Çexiyanı 1:0 üstələmişdilər. İspaniya isə C qrupunda İtaliya ilə sülh bağladıqdan sonra İrlandiyaya 4:0, Xorvatiyaya 1:0 qalib gəlməklə mərhələ adlamışdı. 1/4 finalda isə son Avropa və dünya çempionları Fransanı 2 cavabsız qolla yenmişdilər.
Digər yarımfinal oyununda isə İtaliya və Almaniya yığmaları üz-üzə gələcəklər.
AÇ-2012
Yarımfinal
27 iyun
PORTUQALİYA - İSPANİYA - 0:0 (penaltilərlə - 2:4)
Baş hakim: Cüneyt Çakır (Türkiyə).
Ukrayna. Donetsk. “Donbass Arena”.
PORTUQALİYA: Ruy Patrisiu, B.Alveş, Pepe, Koentrao, J.Pereyra, Velozo (Kustodio, 105), Moutinyo, R.Meyreleş (Varela, 112), Nani, Ronaldo (k), Almeyda (Oliveyra, 81).
İSPANİYA: Kasilyas (k), Pike, S.Ramos, Arbeloa, Alba, İnyesta, Xavi (Pedro, 87), X.Alonso, Buskets, Silva (Navas, 61), Neqredo (Fabreqas, 54).
X.Alonso - 0:0 (qapıçı)
Moutinyo - 0:0 (qapıçı)
İnyesta - 0:1
Pepe - 1:1
Pike - 1:2
Nani - 2:2
S.Ramos - 2:3
B.Alveş - 2:3 (tir)
Fabreqas - 2:4
