Bürünc qəhrəman qayıdır

2008/09 mövsümündə “Simurq”un Premyer Liqada bürünc medallar qazanmasında müstəsna xidmətləri olan Taras Çopik Zaqatalaya qayıdır. Azerisport.az xəbər verir ki, mövsümün əvvəlində zədə üzündən karyerasını başa vuran 38 yaşlı qolkiper oyunçu fəaliyyətini bərpa edib və fevralın 27-də “Simurq”a qoşulacaq.

 

Rauf Mehdiyev və Vitali Postranskinin gedişindən sonra yeganə qapıçı Fuad Əhmədovun ümidinə qalan “Simurq”un bu cür addım atmasının əsas səbəbi Əhmədovun “Turan”la qarşılaşmada zədələnməsidir. Futbolçunun müalicəsi bir müddət çəkəcək və bu müddətdə “sarı-qaralar”ın qapısını Çopik qoruyacaq.

 

Onu da qeyd edək ki, 2009-cu ilin yayında “Simurq”la birillik müqaviləyə imza atan ukraynalı qolkiperin müqaviləsi pozulmayıb və onun adı PFL-ə yayda təqdim olunan sifariş vərəqəsindən çıxarılmayıb.