Maksim Medvedev: İordaniya seçmə mərhələdəki rəqiblərimizlə müqayisəyə gəlməz

Millinin 2010-cu ildə keçirilən ilk oyunu barədə nə deyə bilərsiniz?

Deyərdim ki, bir az gözlənilməz oldu. Rəqib mənfi mənada təəccübləndirdi. Şəxsən mən daha güclü İordaniya gözləyirdim. Bizim isə oyunumuz alındı; ilk dəqiqədə vurulan qolun buna təsiri oldu. İkinci dəfə fərqləndikdən sonra müdafiəyə çəkilsək də, fikrimcə, hesab daha da böyük ola bilərdi. Bir neçə dəfə qol vurmaq imkanını qaçırdıq.

 

İordaniya üzərində qələbə Azərbaycana nə verdi?

İlə müsbət notda başlamaq yaxşıdır. Qələbə seriyasını davam etdirmək və azarkeşlərimizi sevindirmək istəyirik.

 

Müvəqqəti də olsa, yığmanın düşərgəsini niyə tərk edirsiniz?

Bu, şəxsi işlərlə əlaqədardır. Geniş danışmaq istəmirəm.

 

Buraxılan məşqlər Lüksemburqla matçda çıxışınıza mənfi təsir göstərməyəcək ki?

Məşq etmək üçün oyundan əvvəl iki gün vaxtım olacaq. Fikrimcə, görüşə hazır olacam.

 

Müdafiəçi olsanız da, tez-tez hücumlara qoşulursunuz. Buna görə də bəzən mövqeyiniz boşalır. Sonuncu görüşdə bir neçə dəfə belə epizod yarandı.

Mən gəncəm və irəli getmək, hər hücuma qoşulmaq istəyirəm. Razılaşıram ki, bəzən vaxtında mövqeyimə qayıtmaqla bağlı səhvlərim olur. Çatışmamazlıqlar üzərində işləyəcəm, çünki İordaniya seçmə mərhələdə qarşılaşacağımız rəqiblərlə müqayisəyə gəlməz.

 

Bu oyunda Rail Məlikovun meydançaya çıxmasından sonra Foqts sizi yarımmüdafiəyə çəkdi…

Bu mənə bir qədər qəribə gəldi. Məşqçinin niyə belə qərar verdiyini bilmirəm. Görünür, o, Raili həmin mövqedə bir daha sınamaq və rəqabət yaratmaq istəyir.

 

Bəlkə Foqts sizi ümumiyyətlə, orta xətdə oynatmaq istəyir?

Məncə, bu, doğru qərar deyildi, çünki həmin vaxt artıq gücüm tükənmişdi. Buna görə də Railə yaxın oynamağa çalışırdım.

Futbola başlayanda, yarımmüdafiəçi kimi oynayırdım. Bu mövqe mənə yad deyil. Hücumlara qoşula bilirəm. Top itirsəm də, onun uğrunda mübarizə apara bilərəm.