Qalatasarayın məşqçisi: Azərbaycanda uşaq futbolu inkişaf edir
“Qəbələ”nin Futbol Akademiyasının direktoru Ali Yavaş Azərbaycandakı fəaliyyətindən razıdır. Azerisport.az klubun rəsmi saytına istinadla xəbər verir ki, vaxtilə “Qalatasaray”ın uşaq komandalarında baş məşqçi kimi çalışan türkiyəli mütəxəssis gələcəyə də ümidlə baxır: “Yaxınlarda U-17-yə "Qəbələ"nin iki futbolçusu - Ramazan Həsənov və Bəxtiyar Məsiməliyev dəvət olunublar. Bu hadisə bizim üçün çox önəmlidir. Çünki indiyə qədər "Qəbələ"dən aşağı yaş qrupları üzrə yığmalara futbolçu çağırılmamışdı. Qeyd etmək istəyirəm ki, futbol akademiyamız hələ yeni qurulub, ilk addımlarını atır. Ötən mövsümlə müqayisə etdikdə bu qədər qısa zaman kəsiyində belə sürətli templə inkişaf etməyimiz mənə də çox qəribə gəlir. Ümid edirəm ki, gələcəkdə futbol akademiyasının daha böyük uğurlarını izləyəcəksiniz. Burada yaradılan şərait belə düşünməyə əsas verir. Əsas məsələlərdən biri bazanın hazır olmasıdır. Bunun da yaxın vaxtda həyata keçəcəyini nəzərə alsaq, onda gələcəyə olan ümidimiz daha da artar".
