Flaqman XL-ə cavab verdi
Bu gün “Neftçi”nin fan-klublarından biri – “Flaqman” bəyanat yayıb. Azerisport.az xəbər verir ki, “Neftçi” azarkeşləri bəyənatda lənkəranlı fanatlarla heç bir problemlərinin olmadığını bildiriblər: “Bizimlə “Xəzər-Lənkəran” futbol komandasının tərəfdarları arasında heç bir münaqişə baş verməyib. Hətta Lənkəranda keçirilən seçmə mərhələnin Azərbaycan-Finlandiya görüşü zamanı yerli fan-klubun üzvləri bizə qarşı çox xoş münasibət göstərmişlər. Azərbaycanımızın ən gözəl guşələrindən biri Lənkəranın futbol fanatlarıyla yığma komandamızın oyunları zamanı hər zaman birlikdə millimizə dəstək veririk. Biz Azərbaycanın ən köklü komandasının azarkeşləri olaraq bütün rəqiblərə və onların fanatlarına hörmətlə yanaşırıq. “Xəzər-Lənkəran” futbol klubunun fanatları ölkəmizin ən çoxsaylı azarkeş qruplarındandır, bizi onlarla daim dostluq telləri bağlayır. “Flaqman” azarkeşlər qrupu “Neftçi”nin oyunları zamanı yalnız öz sevimli komandamızı dəstəkləməklə məşğuldur. Həmçinin rəqib meydanında bizə qarşı hər zaman yerli azarkeşlər tərəfindən xoş münasibət göstərilib”.
