Tərlan Əhmədov: Qarşımızda konkret məqsəd durur - çempion olmaq

“Xəzər Lənkəran”ın məşqçisi Tərlan Əhmədov ölkə kuboku və premyer liqanın Final mərhələsinin oyunları ərəfəsində azerisport.az-a müsahibə verib.

 

 

Mövsümün final hissəsinə hazırlıq necə gedir?

Normal. Komandanı əsas oyunlara optimal formada gətirməyə çalışırıq. Heç bir xətdə boşluq olmamalıdır. Qarşımızda konkret məqsəd durur: çempion olmaq.

 

“İnter” və “Qarabağ”la müqayisədə yığmalara daha az futbolçu verməyiniz sizin üçün əlavə üstünlükdürmü?

Biz belə fikirləşmirik. Hər komandanın özünəməxsus hazırlıq prosesi var. Bundan əlavə, rəqiblərin heyətindəki yığma üzvləri oyunlara ciddi hazırlaşırlar. Bu fasilə elə bir vaxta düşüb ki, hazırlıq prosesinə elə bir ciddi təsiri olmayacaq. Digər tərəfdən, bizi tək “İnter” və ya “Qarabağ” maraqlandırmır. Onlar bizim yeganə rəqiblərimiz deyil.

 

Qızıl medullar uğrunda mübarizədə mütəxəsəssislər üstünlüyü məhz “İnter” və “Qarabağ”a verir. Belə münasibət sizin xətrinizə dəymir ki?

Hər kəsin öz mövqeyi var. Əminəm ki, bizi favorit sayan insanlar da az deyil. Bu, vacib deyil. Axı biz yalnız azarkeş marağı mükafatı uğrunda mübarizə aparmırıq.

 

Martın 7-də “Qarabağ”la qarşılaşacaqsınız. Ölkə kubokunun 1/4 final mərhələsində…

Əgər mübarizəni bu mərhələdə başa çatdırmaq istəmiriksə, ilk oyundan – səfərdən yaxşı nəticə ilə ayrılmalıyıq.

 

Əsas diqqəti premyer liqaya, yoxsa ölkə kubokuna yönəldəcəksiniz?

Kubok bizim üçün əlahiddə turnirdir. Burada mübarizə tam başqa taktika ilə aparılır, cütlüklərin taleyi iki oyunda həll olunur. Bizim üçün istənilən halda, premyer liqa birinci yerdədir.

 

Martda oyunlarınız qrafiki ağırdır: iki dəfə “Qarabağ”la, “İnter”, “Neftçi”, “Qəbələ”. Hazırsınız?

“Altılığ”a düşəndə belə vəziyyətlə üzləşəcəyimizi bilirdik. Buna görə də hər şeyə hazırıq. Bu cür qrafiklə bütün komandalar mübarizə aparacaq. Çətin olacaq, amma biz heç kimdən qorxmuruq. Yeri gəlmişkən, aprel ayı da çətin keçəcək.