Qəbələ Çelsi, PSV, Portu və Fənərbağça ilə bir turnirdə

Gələn ay "Qəbələ"nin azyaşlı futbolçuları beynəlxalq arenaya ilk addımlarını atacaqlar. Onlar Türkiyədə keçiriləcək "I Beynəlxalq Kuşadası Turniri"ndə iştirak edəcəklər. Azerisport.az xəbər verir ki, 13 yaşlı futbolçulardan ibarət komandamız 1-4 aprel tarixlərinə təyin olunmuş yarışa dəvət alıblar. Qəbələ Futbol Akademiyasının direktoru Əli Yavaş Türkiyəyə son səfəri zamanı təşkilatçılar komandamızı da bu turnirdə görmək istədiklərini bildiriblər. Və təşkilatçı şirkət "Pro-Active Spor Organizasyon"un bu dəvəti klub tərəfindən müsbət qarşılanıb.

 

1997-ci il təvəllüdlü futbolçuların qatılacağı yarışda 24 komanda iştirak edəcək. Onlar arasında məşhur İngiltərə "Çelsi"si, "Midlsbro"su, Portuqaliyadan "Portu", Almaniyadan "Köln", Hollandiyadan PSV, Rumıniyadan "Styaua" və s. məşhur klublar olacaqlar. Türkiyə Superliqası (Fənərbağça, Beşiktaş və Trabzonspor) klublarıda mübarizəyə qoşulacaq. "Qəbələ" üçün bu, beynəlxalq arenada ilk sınaq olacaq.

 

Turnirin əsasnaməsinə görə, protokola 16 oyunçunun adı daxil ediləcək. Oyunlar 25 dəqiqədən ibarət (bir hissə) olacaq ve meydançaya 11 futbolçu çıxacaq. 1 komanda ən azı 7 qarşılaşmada iştirak etmək imkanına malikdir. Təbii ki, istənilən halda Türkiyə səfəri "Qəbələ"nin azyaşlı futbolçuları üçün böyük təcrübə olacaq (gabalafc.az).