Mircavadov Qurbanova nə dedi?

Azərbaycan kubokunun 1/4 final mərhələsinin ilk oyunlarında "Qarabağ" "Xəzər Lənkəran"a qalib gəldi (2:1),"Neftçi" "İnter"ə yenildi (0:3), "Simurq" Zaqatalada "Olimpik-Şüvəlan"la heç-heçə (0:0) oynadı.

 

Azerisport.az komandaların baş məşqçilərin fikirlərini nəzərinizə çatdırır:

 

Qurban Qurbanov, "Qarabağ" klubunun baş məşqçisi: "Hava şəraiti hər iki komandaya baxımlı oyun nümayiş etdirməyə imkan vermədi. Buna baxmayaraq, azarkeşlər üç qolun şahidi oldu. Kubokda iki oyun olur, ona görə də Lənkəranda bizi çox çətin cavab qarşılaşması gözləyir. "Qarabağ"la "Xəzər Lənkəran" arasında oyunlar həmişə gərgin mübarizə ilə yadda qalıb. Lənkəranda keçiriləcək cavab oyunu daha maraqlı olacaq".

 

Ağasəlim Mircavadov, "Xəzər Lənkəran" klubunun baş məşqçisi: "Bildiyiniz kimi, kubok iki oyundan ibarətdir, qarşıda hələ cavab oyunumuz var. Külək və meydançanın pis vəziyyətdə olması hər iki komandaya gözəl oyun göstərməyə imkan vermədi. Komandalar mübarizə apardı, amma futbol görmədik. İndi bütün diqqətimizi martın 12-də keçirəcəyimiz oyuna yönəltmişik".

 

Arif Əsədov, "Neftçi" klubunun baş məşqçisi: "Oyuna ciddi hazırlaşmışdıq, meydana qələbə üçün çıxmışdıq. İlk hissədə üstünlük bizdə olsa da, əldə etdiyimiz imkanlardan istifadə edə bilmədik. Futbolun yazılmayan qanunu var - vurmayana vurarlar. Buraxdığımız ilk qol komandaya pis təsir etdi, futbolçular mənəvi cəhətdən "sındılar". Futbolçularımız fiziki cəhətdən də rəqibə uduzdular. Qarşıda cavab oyunumuz var, "İnter"i qələbə münasibəti ilə təbrik edirəm".

 

Kaxaber Tsxadadze, "İnter" klubunun baş məşqçisi: "Hesaba baxmayaraq, oyun gərgin keçdi. Əldə etdiyimiz imkanlardan maksimum istifadə etdik. İlk oyunu səfərdə keçirdiyimiz üçün müdafiədə diqqətli oynayıb, hücumda imkanlardan faydalanmalıydıq. Futbolçularım verilən bu tapşırığın öhdəsindən gələ bildi, onları təbrik edirəm. Bu qarşılaşmanı unudub, qarşıdakı oyunlara hazırlaşmalıyıq".

 

Roman Pokora, "Simurq" klubunun baş məşqçisi: "Bugünkü oyunda qalib gəlmək istəyirdik. Təəssüf ki, qol vura bilmədik. Amma buna baxmayaraq, futbolçularımın göstərdiyi oyundan razı qaldım. Komandadan gedən legionerlərin səviyyəsi daha üstün idi".

 

Nazim Süleymanov, "Olimpik-Şüvəlan" klubunun baş məşqçisi: "Kubokun ilk oyununda qələbə qazanıb, cavab oyunu üçün əlverişli nəticə əldə etmək istəyirdik. Həm müdafiədə, həm də hücumda bir sıra səhvlərimiz oldu. Qalib gələ bilmədiyimiz üçün təəssüf edirəm".

 

PFL